एजेन्सी – घरेलु टोली बंगलादेशले एकमात्रै टेस्ट खेलमा अफगानिस्तानलाई ५ सय ४६ रनको विशाल अन्तरले पराजित गरेको छ । जितको लागि ६ सय ६२ रनको विशाल विजयी लक्ष्य पछ्याएको अफगानिस्तान १ सय १५ रनमा अल आउट भयो ।

अफगानिस्तका रहमात शाहले सर्वाधिक ३० रन बनाए । कप्तान हश्मातुल्लाह शाहिदीले १३ र करिम जन्नत १८ रनमा आउट भए । अन्य कुनैपनि अफगानी ब्याटरले दोहोरो अंकमा रन बनाउन सकेनन् । तस्किन अहमदले चार र शोरिफुल इस्लामले तीन विकेट लिए ।

बंगलादेशले दोस्रो इनिङमा ४२५–४ को अवस्थामा इनिङ समाप्तिको घोषणा गर्यो । नाज्मुल हसन शान्टोले १ सय ५१ बलमा १५ चौकासहित १ सय २४ रनको शतकीय इनिङ खेले । मोमिनुल हकले १ सय ४५ बलमा १२ चौका र १ छक्कासति १ सय २१, लिटन दास ६६ र जकिर हसनले ७१ रन बनाए । अफगानिस्तानका जाहिर खानले सर्वाधिक दुई विकेट लिए ।

अफगानिस्तान पहिलो इनिङमा १ सय ४६ रनमा अल आउट भएको थियो । अफगानिस्तानका नासिर जमलले ३५ र अफ्सार जजाईले सर्वाधिक ३६ रन बनाए । बंगलोदशका एबादोत हुसैनले सर्वाधिक चार, शोरिफुल इस्लाम, ताइजुल इस्लाम र मेहदी हसन मिराजले समान दुई विकेट लिए ।

त्यसअघि मिरपुरमा टस हारेर पहिला ब्याटिङको निम्तो पाएको बंगलोदश ३ सय ८२ रनमा अल आउट भएको थियो । बंगलादेशका नाज्मुल हसन शान्टोले १ सय ७५ बलमा २३ चौका र २ छक्कासहित सर्वाधिक १ सय ४६ रन बनाए । दुबै इनिङमा शतक हानेका शान्टो खेलको प्लेयर अफ द म्याच चुनिए । अफगानिस्तानका निजात मसुदले सर्वाधिक पाँच विकेट लिएका थिए ।