काठमाडौं (हाम्रो खेलकुद) – नेपालले आइसिसी एकदिवसीय विश्वकप छनोट अन्तर्गत आफ्नो दोस्रो खेलमा आज अमेरिकासँग खेल्दैछ । खेल नेपाली समय अनुसार दिउँसो १२: ४५ मा सुरुहुनेछ । नेपाल अमेरिकालाई हराउँदै सुपर सिक्समा पुग्ने बलियो सम्भावना बनाउन चाहन्छ । दुबै टोली पहिलो जितको खोजीमा हुनेछन् ।

नेपाल पहिलो खेलमा जिम्बावेसाँग ८ र अमेरिका वेस्टइन्डिजसँग ३९ रनले पराजित भएको थियो । नेपाल र अमेरिका दुबैले टेस्ट टोलीविरुद्ध सानदार प्रदर्शन गरेको हुँदा उच्च मनोबलका साथ मैदान उत्रर्नछन् । नेपालले आज टोलीमा एक परिवर्तन गर्ने पक्का छ । घाइते तीव्र गतिका बलर सोमपाल कामी आजको खेलमा उपलब्ध हुनेछैनन् ।

त्यसैले उनको स्थानमा स्पिनर ललितनारायण राजवंशी वा एक तीव्र गतिका बलर खेलाउनेछ । यदि ललितलाई नखेलाएको अवस्थामा प्रतिश जि.सी र किशोर महतो मध्य एकलाई खेलाउनेछ । किशोर महतो भने अन्तिम १५ मा थिएनन् । यदि २४ घण्टा अघि आइसिसीलाई जानकारी दिएको खण्डमा मात्रै खेल्नेछन् ।

जिम्बावेविरुद्ध ३४ औं ओभरमा बलिङ गर्नेक्रममा उनको बुढी औंलामा चोट लाग्न पुगेको थियो । त्यसैको कारण उनी फिट नभएको हाम्रो खेलकुदलाई स्रोतले जानकारी दिएको छ । टोलीमा अन्य परिवर्तनको सम्भावना भने छैन । नेपालले बलिङ भने उत्कृष्ट गर्नुपर्ने हुन्छ । प्रमुख बलर सन्दीप लामिछानेको प्रदर्शन निकै महत्वपूर्ण हुनेछ ।

जिम्बावेविरुद्ध सन्दीपले १० ओभरमा ७७ रन खर्चेका थिए । सन्दीप लगातार ३३ इनिङपछि विकेट विहीन बन्न पुगेका थिए । युएईविरुद्ध टियुमा १० ओभरमा ८० रन खर्चेर १ विकेट लिएपछिको खराब प्रदर्शन थियो । २०२० मा अमेरिकालाई ओडिआई इतिहासकै सबैभन्दा कम ३५ रनमा अल आउट गर्न सन्दीपले ६ विकेट लिएका थिए । त्यसैले पनि सन्दीपको प्रदर्शन निकै महत्वपूर्ण हुनेछ ।

सोमपाल नहुँदा करणमाथि जिम्मेवारी बढ्नेछ । करण र गुलशन पहिलो रोजाईको तीव्र गतिको बलर हुनेछन् । नेपालको ब्याटिङक्रम भने उत्कृष्ट छ । ओपनर आसिफ शेख र कुशल भुर्तेलले जिम्बावेविरुद्ध १ सय ७१ रनको शतकीय साझेदारी गरेका थिए । ९९ रनमा आउट हुनु परेको पिडा कुशल अमेरिकाविरुद्ध पोख्न चाहन्छन् । आसिफले ६६ रन बनाउँदै कुशललाई राम्रो साथ दिएका थिए । नेपाल कुशलबाट आक्रामक र आसिफबाट अर्को एन्डबाट साथ चाहन्छ ।

नेपालले अन्तिम पाँच ओभरमा ३२ रन बनाउँदा ४ विकेट गुमाएको थियो । त्यो हारको एक कारण थियो । फिनिसरबाट नेपाल उत्कृष्ट प्रदर्शन चाहन्छ । फिनिसरमा करण र दीपेन्द्र हुनेछन् । नेपालले खराब सुरुवात गर्दा पनि विशाल योगफल बनाउन सक्छ । तेस्रो नम्बरका भीम सार्की, चौथो नम्बरमा रोहित पौडेल र पाँचौं नम्बरका कुशल मल्लको प्रदर्शन महत्वपूर्ण हुनेछ ।

उच्च लयमा रहेका कुशल मल्लले २०२० मा अमेरिकाविरुद्ध डेब्यू गर्दै ५० रन बनाएका थिए । नेपाल कुशलबाट विष्फोटक ब्याटिङ चाहन्छ । आरिफ शेखले तल्लोक्रम सम्हाल्नेछन् । अमेरिकामा बायाँ हाते तीव्र गतिका बलर सौरभ नेत्रवालकर छन् । भारतीय यू१९ र रणजी अनुभवी सौरभबाट नेपाल सचेत हुनुपर्छ ।

बायाँ हाते बलर नेपाली ब्याटरको कमजोरी बन्दै आएको छ । उता अमेरिका ओपनर स्टिभ टेलर नेपालविरुद्ध सधैं हाबी हुँदै आएका छन् । २०१३ को डिभिजन थ्रीमा उनले १ सय २ बलमा १२ चौका र १२ छक्कासहित १ सय ६० रनको विष्फोटक शतकीय इनिङ खेलेका थिए । त्यस्तै गतवर्ष अमेरिकामै उनले नेपालविरुद्ध १ सय १४ रनको शतकीय इनिङ खेलेका थिए । ओमानमा उनले नेपालविरुद्ध ६३ बलमा ९२ रनको इनिङ खेलेका थिए ।

बायाँ हाते ओपनर टेलर विष्फोटक ब्याटिङका लागि बढी रुचाउँछन् । उनी धेरै समय क्रिजमा टिकेको खण्डमा नेपालको जित कठिन बन्नेछ । त्यसैले उनको विकेट निकै महत्वपूर्ण हुने देखिन्छ । कप्तान मोनांक पटेल राम्रो लयमा छन् । उनले पनि नेपालविरुद्ध लगातार राम्रो खेल्दै आएका छन् । लिग २ मा २ शतक र ८ अर्धशतकसहित १२ सय १९ रन बनाएका पटेलको विकेट चाँडै लिनुपर्छे हुन्छ ।

वेस्टइन्डिजविरुद्ध शतक हानेका गजानन्द सिंहको मनोबल पनि उच्च छ । नेपाललाई १९ वर्षीय ब्याटर साइतेजा मुकामल्लाले सरप्राइज दिनसक्छन् । युवा खेलाडी उनले अमेरिकाबाट राम्रो प्रदर्शन गर्दै आएका छन् । अमेरिकालाई विश्वकप छनोटमा पुर्याउन उनले प्लेअफ क्वालिफायरमा युएईविरुद्ध १ सय २० रनको सानदार शतकीय इनिङ खेलेका थिए ।

आरोन जोन्स, जेसी सिंह, सुशान्त मोदानी र शयान जहाजिंगरबाट पनि अमेरिका राम्रो प्रदर्शन चाहन्छ । उता अमेरिकाका प्रमुख तीव्र गतिका बलर अली खान आजको खेल पनि खेल्न पाउने छैनन् । चार डेमीरेट प्वाइन्टका कारण अली खानलाई दुई खेल प्रतिबन्ध लागेको थियो । आजको खेलपछि उनको प्रतिबन्ध फुकुवा हुनेछ ।

तर युवा बलर कायल फिलिपले वेस्टइन्डिजविरुद्ध तीन विकेट लिँदै अली खानको अभाव महसुस हुन नदिने संकेत दिएका छन् । २६ वर्षीय फिलिपको बलमा स्वींग र गती छ । सौभर र फिलिपको बलिङ पावर प्लेमा महत्वपूर्ण हुनेछ । स्पिन आक्रामण र मध्यक्रम ब्याटिङ अमेरिकाको कमजोरीको रुपमा छ । शीर्षक्रम ब्याटिङ र तीव्र गतिको बलिङ अमेरिकाको हतियार हो ।

यदि नेपाल यस खेलमा पराजित भएको खण्डमा सुपर सिक्समा पुग्न वेस्टइन्डिज र नेदरल्यान्ड्स दुबैलाई हराउनु पर्छ । आज अर्को खेलमा नेदरल्यान्ड्सले घरेलु टोली जिम्बावेसँग खेल्नेछ ।

जिम्बावे लगातार दोस्रो जितको खोजीमा हुनेछ । नेदरल्यान्ड्स जिम्बावेलाई स्तब्ध पार्न सक्छ । काउन्टीका कारण नेदरल्यान्ड्सको टोलीमा पहिलो रोजाईका तीव्र गतिका बलर छैनन् । अलराउन्डर बास डि लिडेको प्रदर्शन महत्वपूर्ण हुनेछ । नेपालविरुद्ध शतक हानेका दुई अनुभवी ब्याटर सन विलियम्स र क्रेग इर्विन प्रमुख हतियार हुन् ।

हेड टु हेड :

नेपाल र अमेरिकाबीच ६ ओडिआई खेल भएको छ । नेपाल ३ खेलमा विजयी, दुई मा पराजित र एक खेल टाई भएको छ । २०२० मा नेपालले टियु मैदानमा अमेरिकालाई ३५ रनमा अल आउट गरेको थियो । त्यस्तै २०२२ मा अमेरिकाले आफ्नो घरेलु मैदानमा २ सय ७५ रनको लक्ष्य पछ्याउनेक्रममा खेलमा टाई गरेको थियो ।

मौसम :

हरारेमा आज कुनैपनि वर्षाको सम्भावना छैन । न्यूनतम तापक्रम ११ र उच्चतम तापक्रम २४ डिग्री सेल्सियस हुनेछ ।

अंक तालिका
समूह ए मा जिम्बावे २ अंकका साथ शीर्ष स्थानमा छ । वेस्टइन्डिज पनि २ अंकका साथ दोस्रो स्थानमा छ । समूह बी मा श्रीलंका र ओमान शीर्ष र दोस्रो स्थानमा छन् । सोमबार ओमानले आयरल्यान्डलाई ५ विकेटले हराउँदै सनसनी मच्चाएको थियो ।

नेपालको टोली :

कुशल भुर्तेल, आसिफ शेख (विकेटकिपर), ज्ञानेन्द्र मल्ल, रोहित पौडेल (कप्तान), कुशल मल्ल, आरिफ शेख, दीपेन्द्रसिंह ऐरी, गुलशन झा, सोमपाल कामी, करण केसी, सन्दीप लामिछाने, भीम सार्की, प्रतिश जि.सी, ललित राजवंशी र अर्जुन साउद ।

अमेरिकाको टोली :

मोनांक पटेल (कप्तान तथा विकेटकिपर), आरोन जोन्स (उप-कप्तान), शयान जहाजिंगर, केंजिगे, अली खान, सुशान्त मोदानी, साईतेजा मुकामल्ला, सौरभ नेत्रवालकर, अभिषेक परादकर, निसर्ग पटेल, कायल फिलिप, उस्मान रफिक, गजानन्द सिंह, जेसी सिंह र स्टिभ टेलर ।

समूह ए : नेपाल, जिम्बावे, वेस्टइन्डिज, नेदरल्यान्ड्स र अमेरिका

समूह बी : श्रीलंका, स्कटल्यान्ड, आयरल्यान्ड, ओमान र युएई

असार ७ (जुन २२) – नेपालविरुद्ध वेस्टइन्डिजः हरारे स्पोर्ट्स क्लब

असार ९ (जुन २४) – नेपालविरुद्ध नेदरल्यान्ड्स, ताकाशिंगा स्पोर्ट्स क्लब