एजेन्सी – नेदरल्यान्ड्सले आइसिसी एकदिवसीय विश्वकप छनोटमा घरेलु टोली जिम्बावेलाई ३ सय १६ रनको विशाल विजयी लक्ष्य दिएको छ । हरारे स्पोर्ट्स क्लबमा टस हारेर पहिला ब्याटिङको निम्तो पाएको नेदरल्यान्ड्सले निर्धारित ५० ओभरमा ६ विकेट गुमाउँदै ३ सय १५ रन बनायो ।

नेदरल्यान्ड्सका ओपनर विक्रमजित सिंहले १ सय ११ बलमा ९ चौकासहित सर्वाधिक सर्वाधिक ८८ रनमा आउट भए ।
त्यस्तै कप्तान स्कट एड्वार्ड्सले ७२ बलमा ८ चौकासहित ८३ रनमा आउट भए ।

नेदरल्यान्ड्सलाई ओपनर म्याक्स ओडाउड र विक्रमजित सिंहले २०.२ ओभरमा १ सय २० रनको शतकीय साझेदारी गर्दै राम्रो सुरुवात दिलाएका थिए । म्याक्स ओडाउड ६७ बलमा १० चौकासहित ५९ रनमा आउट भए ।

वेस्ली ब्यारेसी ४ रनमा आउट भए । बास डि लिडे पनि चार रनमै आउट भए । यी तीनै खेलाडी सिकन्दर राजाको बलमा बोल्ड आउट हुन पुगेका थिए । तेस्रो विकेटका लागि विक्रम र स्कटले ९७ बलमा ९६ रनको सानदार साझेदारी गर्दै विशाल योगफलको आधार तय गरेका थिए ।

सकिब जुल्फिकर ३१ बलमा २ चौका र १ छक्कासहित ३४ रनमा नट आउट रहे । जिम्बावेका सिकन्दर राजाले १० ओभरमा ५५ रन खर्चेर सर्वाधिक ४ विकेट लिए । रिचर्ड नागारावाले ९ ओभरमा २ मेडनसहित ४० रन खर्चेर २ विकेट लिए ।