एजेन्सी – कप्तान प्याट कमिन्सले कप्तानी प्रदर्शन गरेपछि अष्ट्रेलियाले विश्व क्रिकेटको एक प्रतिष्ठित द एशेज सिरिजको पहिलो टेस्ट खेलमा घरेलु टोली इंग्ल्यान्डमाथि दुई विकेटको रोमान्चक जित हात पारेको छ ।

जितको लागि २ सय ८१ रनको विजयी लक्ष्य पछ्याएको अष्ट्रेलियाले ८ विकेट गुमाउँदै पूरा गर्यो । पाँचौं तथा अन्तिम दिन भोजन समय सम्म वर्षाको कारण कुनैपनि खेल हुन सकेको थिएन ।

प्याट कमिन्स ७३ बलमा ४ चौका र २ छक्कासहित ४४ रनमा नट आउट रहे । नाथन लायनले २८ बलमा २ चौकासहित १६ रनमा नट आउट रहँदै राम्रो साथ दिए । नवौं विकेटका लागि कमिन्स र लायनले ५५ रनको नटआउट साझेदारी गर्दै रोमान्चक जित पक्का गराएका हुन् ।

ओपनर उस्मान खवाजा १ सय ९७ बलमा ७ चौकासहित ६५ रनमा आउट भए । टेस्टका सबै पाँच दिन ब्याटिङ गर्ने दुर्लभ अवसर पाएका खवाजा बेन स्टोक्सको बलमा बोल्ड आउट भए । डेविड वार्नर ३६, मार्नस लाबुसेन १३, स्टिभ स्मिथ ६, स्कट बोलान्ड २० र क्यामरन ग्रीन २८ रनमा आउट भए ।

इंग्ल्यान्डका स्टुअर्ट ब्रोडले तीन र ओली रोविनन्सनले दुई विकेट लिए । इंग्ल्यान्ड दोस्रो इनिङमा २ सय ७३ रनमा अल आउट हुन पुगेको थियो । इंग्ल्यान्डका जो रुट र ह्यारी ब्रुकले सर्वाधिक समान ४६ रनको योगदान दिएका थिए । ओपनर ज्याक क्रली ७, बेन डकेट १९, ओली पोप १४, बेन स्टोक्स ४३, जोनी बेयरस्टो २० र मोईन अली १९ रनमा आउट भए । ओली रोविन्सन २७ र जिमी एन्डरसन १२ रनमा आउट भएका थिए । अष्ट्रेलियाका कप्तान प्याट कमिन्स र नाथन लायनले समान चार विकेट लिए ।

अष्ट्रेलिया पहिलो इनिङमा ३ सय ८६ रनमा अल आउट भएको थियो । ओपनर उस्मान खवाजाले ३ सय २१ बलमा १४ चौका र ३ छक्कासहित सर्वाधिक १ सय ४१ रनको शतकीय इनिङ खेलेका थिए । विकेटकिपर एलेक्स केरी ६६, ट्रविस हेड ५०, स्मिथ १६ र मार्नस लाबुसेन डक आउट भए । इंग्ल्यान्डका स्टुअर्ट ब्रोड र ओली रोबिन्सनले समान तीन विकेट लिए । मोईन अलीले दुई, जिमी एन्डरसन र बेन स्टोक्सले एक एक विकेट लिए ।

त्यसअघि बर्मिङ्घमा टस जितेर पहिला ब्याटिङ रोजेको इंग्ल्यान्ड पहिलो दिन मात्रै ७८ ओभरमा ३९३-८ को अवस्थामा इनिङ समाप्तिको घोषणा गरेको थियो । इंग्ल्यान्डका जो रुट १ सय ५२ बलमा ७ चौका र ४ छक्कासहित १ सय १८ रनमा नट आउट रहेका थिए । जो रुटले सानदार प्रदर्शन गरि रहँदा इनिङ समाप्तिको निर्णय इंग्ल्यान्डलाई ठूलो भारी परेको छ ।

छैटौं विकेटका लागि रुट र जोनी बेयरस्टोले १ सय २१ रनको शतकीय साझेदारी गरेका थिए । बेयरस्टो ७८ बलमा १२ चौकासहित ७८ रनमा आउट भए ।

ओपनर ज्याक क्रलीले ७३ बलमा ७ चौकासहित ६१ रनमा आउट भए । अष्ट्रेलियाका नाथन लायनले सर्वाधिक चार विकेट लिए । जोश हेजलवुडले दुई, स्कट बोलान्ड र क्यामरन ग्रीनले समान एक विकेट लिए । दोस्रो खेल २८ जुन देखी सुरु हुनेछ ।