एजेन्सी – युवा अलराउन्डर कर्टिस क्याम्फरको सानदार शतकमा आयरल्यान्डले आइसिसी विश्वकप छनोटमा स्कटल्यान्डलाई २ सय ८७ रनको बलियो लक्ष्य दिएको छ ।

क्विन्स स्पोर्ट्स क्लबमा टस हारेर पहिला ब्याटिङको निम्तो पाएको आयरल्यान्डले निर्धारित ५० ओभरमा ८ विकेट गुमाउँदै २ सय ८६ रन बनायो । आयरल्यान्डका कर्टिस क्याम्फरले १ सय ८ बलमा ९ चौका र ४ छक्कासहित १ सय २० रनको एक यादगार शतकीय इनिङ खेले ।

यो उनको ओडिआई क्रिकेट करिअरको पहिलो शतक हो । यो उनको अन्तर्राष्ट्रिय स्तरको उच्च प्रदर्शन हो । टेस्ट टोली आयरल्यान्डको सुरुवात भने सम्झन लायक थिएन । तीव्र गतिका बलर ब्रेन्डन म्याकमुलेनको इनिङको दोस्रो बलमै पल स्टर्लिङ एज लागेर स्लिपमा मार्क वाटबाट क्याच आउट भएका थिए । लगत्तै अर्को बलमा कप्तान एन्डी बालबर्नी डक आउट भएपछि आयरल्यान्ड दबाबमा परेको थियो ।

म्याकमुलेनले ह्यारी टेक्टरलाई ६ रनरमा जर्ज मुन्शेबाट क्याच गराए । स्पिनर मार्क वाटले लोर्कान टकरलाई ६ रनमा मुन्शेबाट क्याच गराएपछि आयरल्यान्ड ८.२ ओभरमा ३३-४ को दयनीय अवस्थामा पुगेको थियो । पाँचौं विकेटका लागि क्याम्फर र एन्डी म्याकबर्नी ३७रनको साझेदारी गरेका थिए । म्याकबर्नी ५४ बलमा ४ चौकासहित ३२ रनमा आउट भए ।

त्यो समय आयरल्यान्ड १८.२ ओभरमा ७०(५ को अवस्थामा थियो । तर छैटौं विकेटका लागि क्याम्फर र जर्ज डोकरेलले १ सय ३६ रनको शतकीय साझेदारी गरेपछि आयरल्यान्ड खेलमा फर्किएको थियो । डोकरेल ९३ बलमा ४ चौका र १ छक्कासहित ६९ रनमा म्याकमुलेनको बलमै बोल्ड आउट भए । ग्यारेथ डेलानी १४ बलमा १ छक्कासहित १९ रनमा आउट भए ।

स्कटल्यान्डका ब्रेन्डन म्याकमुलेनले ७ ओभरमा १ मेडनसहित ३४ रन खर्चेर ५ विकेट लिए । क्रिस सोले, मार्क वाट र क्रिस म्याकब्रीडेले एक एक विकेट लिए ।