काठमाडौं (हाम्रो खेलकुद) – नेपालले पहिलो पटक आइसिसी विश्वकप विजेता टोली वेस्टइन्डिजसँग खेल्दैछ । नेपालले आइसिसी विश्वकप छनोट अन्तर्गत तेस्रो खेलमा चार पटकको विश्वकप विजेता वेस्टइन्डिजसँग बिहीबार खेल्दैछ । खेल नेपाली समय अनुसार दिउँसो १२ : ४५ मा जिम्बावेको हरारे स्पोर्ट्स क्लबमा सुरु हुनेछ ।

नेपालले पहिलो पटक आफ्नो क्रिकेट इतिहासमा कुनैपनि विश्वकप विजेता टोलीसँग खेल्नेछ । वेस्टइन्डिज नेपालले प्रतिस्पर्धा गर्ने इतिहासकै सबैभन्दा ठूलो स्तरको टोली समेत हो । आइसिसीले टि२० र एकदिवसीय गरि दुई विश्वकप प्रतियोगिता आयोजना गर्दै आएको छ । जसमा हालसम्म टि२० विश्वकप वेस्टइन्डिज, इंग्ल्यान्ड, भारत, श्रीलंका, अष्ट्रेलिया र पाकिस्तानले जित्न सफल भएका छन् ।

एकदिवसीय विश्वकप वेस्टइन्डिज, भारत, अष्ट्रेलिया, इंग्ल्यान्ड, पाकिस्तान र श्रीलंकाले जितेका छन् । यी विश्वकप विजेता मध्य वेस्टइन्डिजसँग नेपालले खेल्न लागेको हो । अन्य टोलीसँग हालसम्म खेलेको छैन । आगमी सेप्टेम्बरमा हुने एसिया कपमा भारत र पाकिस्तानसँग पनि खेल्दैछ । वेस्टइन्डिजले विश्वकप सन् १९७५ र १९७९ मा जितेको थियो । टि२० विश्वकप भने वेस्टइन्डिजले २०१२ र २०१६ मा जितेको थियो ।

नेपालले आइतबार ओडिआईमा पहिलो पटक टेस्ट टोली जिम्बावेसँग खेलेको थियो । नेपालले टि२० आईमा भने आयरल्यान्ड, बंगलादेश र जिम्बावेसँग खेलि सकेको छ । अफगानिस्तानसँग पनि टि२० आई खेलेको छ । तर अफगानिस्तान टेस्ट टोली बन्नुअघिनै खेलेको थियो ।

आइसिसी विश्व ओडिआई वरियतामा वेस्टइन्डिज १० औं र नेपाल १४ औं स्थानमा छन् । त्यस्तै टि२० आई वरियतामा नेपाल १७ औं र वेस्टइन्डिज ७ औं स्थानमा छन् । वेस्टइन्डिजको कप्तानी शाई होप र नेपालको रोहित पौडेलले गर्नेछन् ।

वेस्टइन्डिजमा वर्तमान समयका टि२० विशेष खेलाडी निकोलस पुरन, रोभम्यान पावेल, कायल मेयर्स र ब्रेन्डन किंग जस्ता खेलाडी छन् । त्यस्तै विश्वस्तरिय अलराउन्डर जेसन होल्डर र तीव्र गतिका बलर अल्जारी जोशेफ पनि छन् ।

यता नेपालका स्पिनर सन्दीप लामिछानेबाट नेपालले धेरै अपेक्षा गर्नेछ । उनी सुरुवाती दुई खेलमा जिम्बावे र अमेरिकाविरुद्ध विकेट विहीन बनेका थिए । कुशल भुर्तेल, करण केसी र रोहित पौडेलको प्रदर्शन निकै महत्वपूर्ण हुनेछ ।