एजेन्सी – लगातार दुई हारसँगै युनाइटेड अरव इमिरेट्स (युएई) र टेस्ट टोली आयरल्यान्ड समूह चरणबाटै बाहिरिने सम्भावना बढेको छ । समूह बी मा रहेको आयरल्यान्ड दुई एसोसिएट टोली स्कटल्यान्डसँग एक विकेट र ओमानसँग पाँच विकेटले पराजित भएपछि सुपर सिक्स यात्रा निकै कठिन बनेको हो ।

युएई श्रीलंकासँग १ सय ७५ रन र ओमानसँग ५ विकेटले पराजित भएको थियो । आयरल्यान्डले आइतबार श्रीलंका र मंगलबार युएईसँग खेल्नेछ । युएईले शुक्रबार स्कटल्यान्ड र आयरल्यान्डसँग खेल्नेछ । आयरल्यान्ड र युएई एकअर्कासँग खेल्न बाँकी हुँदा पराजित टोली बाहिरिने पक्का देखिन्छ ।

युएईको नेटरनरेट माइनस २.००३ छ । यो अवस्थामा बाँकी दुबै खेलमा विजयी भएपनि नेटरनरेटको कारण पुग्नसक्ने सम्भावना निकै कम देखिन्छ । अर्कोतर्फ बाँकी दुबै खेल जितेर मात्रै हुँदैन । ओमानले श्रीलंका र स्कटल्यान्ड दुबैसँग फराकिलो अन्तरले हार्नुपर्ने हुन्छ । वा स्कटल्यान्डले बाँकी सबै खेल हार्नुपर्छ । सुरुवाती दुई हारले युएई र आयरल्यान्डको सुपर सिक्स सम्भावना निकै कठिन बनेको हो ।

यता समूह ए मा जिम्बावे सुरुवाती दुई खेलमा जितका साथ सुपर सिक्स नजिक पुगेको छ । वेस्टइन्डिज एक खेलमा २ अंकका साथ दोस्रो र नेपाल समान एक खेलमा हार र जितका साथ तेस्रो स्थानमा छ । अमेरिका र नेदरल्यान्ड्स चौथो र पाँचौं स्थानमा छन् । समूह ए मा नेपाल र नेदरल्यान्ड्सबीचको खेल क्वाटरफाइनल सरह हुने अनुमान गरिएको छ ।

सुपर सिक्समा पुग्ने तीन टोलीको प्रदर्शन समूह चरणकै गणना हुनेछ । अर्को समूहबाट आउने तीन टोलीबीच प्रतिस्पर्धा हुनेछ । समूह चरणमा अपराजित रहँदै सुपर सिक्समा पुग्ने टोलीको चार अंक हुँदा विश्वकप खेल्न सहज हुने देखिन्छ । सुपर सिक्सका शीर्ष दुई टोलीले आगमी अक्टोबर नोभेम्बरमा भारतमा हुने एकदिवसीय विश्वकप खेल्न पाउनेछन् ।