काठमाडौं (हाम्रो खेलकुद) – नेपाली क्रिकेट टोलीका आक्रामक अलराउन्डर कुशल मल्ल आइसिसी विश्वकप छनोटमा वेस्ट इन्डिजविरुद्ध उत्कृष्ट क्याचको शिकार हुँदै पेभेलिएन फर्केका छन् ।

जितको लागि ३ सय ४० रनको विशाल विजयी लक्ष्य पछ्याएको नेपालले २४ ओभरमा ५ विकेट गुमाउँदै १ सय २ रन बनाएको छ । नेपालका आरिफ शेख १८ र दीपेन्द्र सिंह ऐरी १० रनमा नट आउट छन् ।

कुशल मल्ल २ रनमा वैकल्पिक फिल्डर केसी कार्टीबाट क्याच आउट हुन पुगे । स्पिनर अकील हुसैनको २३ औं ओभरको पहिलो बलमा ठूलो सट खेलको कुशल लङअनमा विश्वस्तरिय क्याच आउटको शिकार हुन पुगेका थिए ।

लङअनमा केसी कार्टीले उत्कृष्ट क्याचका साथ छक्काको बल रोक्दै बाउन्ड्री बाहिर फालेका थिए । भित्रबाट उनले पुन उक्त बल बाहिर फाल्दै उत्कृष्ट क्याचका साथ कुशललाई पेभेलिएनको बाटो देखाएका हुन् ।

त्यसअघि हरारे स्पोट्र्स क्लबमा टस हारेर पहिला ब्याटिङको निम्तो पाएको वेस्ट इन्डिजले निर्धारित ५० ओभरमा ७ विकेट गुमाउँदै ३ सय ३९ रन बनाएको थियो । वेस्ट इन्डिजका कप्तान शाई होपले १ सय ३२ र निकोलस पुरन १ सय १५ रनको शतकीय इनिङ खेलेका थिए ।