एजेन्सी – अमेरिका आइसिसी विश्वकप छनोटमा घरेलु टोली जिम्बावेसँग ३ सय ४ रनको फराकिलो अन्तरले पराजित भएको छ । जिम्बावे समूह ए बाट अपराजित रहँदै ४ अंकका साथ सुपर सिक्समा पुगेको छ ।

सुपर सिक्समा पुगेका आफ्ना समूहका नेदरल्यान्ड्स र वेस्टइन्डिजलाई हराएको हुँदा ४ अंक लगेर जाने भएको हो । जितको लागि ४ सय ९ रनको विशाल विजयी लक्ष्य पछ्याएको अमेरिका २५.१ ओभरमा १ सय ४ रनमा अल आउट भयो । यो ओडिआई इतिहासकै दोस्रो सबैभन्दा रन अन्तरले फराकिलो हार हो ।

ओडिआईमा सवैभन्दा ठूलो अन्तरको हार गत जनवरीमा श्रीलंका भारतसँग ३ सय १७ रनको फराकिलो अन्तरले पराजित भएको थियो । त्यो बाहेक अन्य कुनैपनि ओडिआई खेलमा ३ सय रनको हार व्यहोरेका थिएनन् ।

अमेरिकाका अभिषेक पराडकरले ३१ बलमा ३ चौकासहित २४ र जेसी सिंहले २६ बलमा ४ चौकासहित २१ रन बनाए । अन्य कुनैपनि अमेरिकी ब्याटरको प्रदर्शन सम्झन लायक रहेन । स्टिभ टेलर डक, सुशान्त मोदानी ६, मोनांक पटेल ९, आरोन जोन्स ८ र गजानन्द सिंह १३ रनमा आउट भए ।

जिम्बावेका रिचर्ड नगाराव र सिकन्दर राजाले समान दुई विकेट लिए । ब्रान्ड इभान्स, ल्यूक जाेंगवे र रायन बर्लले समान एक विकेट लिए ।

त्यसअघि हरारेमा टस हारेर पहिला ब्याटिङको निम्तो पाएको जिम्बावेले निर्धारित ५० आभरमा ६ विकेट गुमाउँदै कीर्तिमानी ४ सय ८ रनको योगफल तयार पारेको थियो । यो जिम्बावेले आफ्नो ओडिआई इतिहासमा बनाएको सर्वाधिक ठूलो योगफल हो । यसअघि जिम्बावेको ओडिआईमा सर्वाधिक ठूलो योगफल २००९ मा केन्याविरुद्ध ३ सय ५१ रन थियो ।

जिम्बावेका सन विलियम्सले १ सय १ बलमा २१ चौका र ५ छक्कासहित १ सय ७४ रनको सानदार शतकीय इनिङ खेले । उनको यो करिअरको उत्कृष्ट प्रदर्शन हो । समग्रमा जिम्बावेबाट ओडिआई एकै खेलमा उच्च प्रदर्शन गर्ने तेस्रो खेलाडी हुन्। यसअघि जिम्बावेका चाल्र्स कभेन्टीले २००९ मा बंगलादेशविरुद्ध १ सय ९४ तथा हिमाल्टन मसाकाड्जाले केन्याविरुद्ध १ सय ७८ रनको अविजित इनिङ खेलेका थिए ।

ओपनर जोयलोर्ड गुम्बी १ सय ३ बलमा ५ चौकासहित ७८ र इनोसेन्ट कैया ३२ रनमा आउट भए । तेस्रो विकेटका लागि सिकन्दर राजा र विलियम्सले ८८ रनको आक्रामक साझेदारी गरेका थिए । राजा २७ बलमा ५ चौका र २ छक्कासहित ४८ रनमा आउट भए । रायन बर्ल १६ बलमा ३ चौका र ४ छक्कासहित ४७ रनमा आउट भए । अमेरिकाका अभिषेश पाराडकरले ९ ओभरमा ७८ रन खर्चेर ३ विकेट लिए । जेसी सिंहको नाममा २ विकेट रह्यो ।

जिम्बावेले नेपाललाई ८ विकेट, नेदरल्यान्ड्सलाई ६ विकेट र वेस्टइन्डिजलाई ३५ रनले हराएको थियो । जिम्बावेले सुपर सिक्समा समूह बी का शीर्ष तीन टोली श्रीलंका, स्कटल्यान्ड र ओमानसँग खेल्नेछ । तीन मध्य दुई खेलमा विजयी भएमा आगमी अक्टोबर नोभेम्बरमा भारतमा हुने एकदिवसीय विश्वकप खेल्ने उच्च सम्भावना देखिन्छ ।