एजेन्सी – विश्व क्रिकेटका दुई चर्चित टोली पाकिस्तान र भारतबीचको आइसिसी विश्वकप २०२३ को खेल नरेन्द्र मोदी स्टेडियम अहमदाबादमा हुने भएको छ । अन्तर्राष्ट्रिय खेलकुद परिष्द (आइसिसी) ले विश्वकप २०२३ को खेल तालिका सार्वजनिक गरेको छ । प्रतियोगिता ५ अक्टोबर देखी १९ नोभेम्बरसम्म भारतका १० स्थानमा हुनेछन् ।

भारत र पाकिस्तानबीचको खेल १५ अक्टोबरमा हुनेछ । विश्वकपमा भारत र पाकिस्तानको खेल सवैभन्दा बढी प्रतीक्षमा रहनेछ । यी दुई देशले आन्तरिक राजनीतिको कारण सिरिज नखेल्ने हुँदा आइसिसी र एसिसीको प्रतियोगिता निकै महत्वपूर्ण रुपमा हेरिन्छ ।

विश्वकप अघि भारत र पाकिस्तानले सेप्टेम्बरमा एसिया कप खेल्नेछन् । एसिया कपमा भारत र पाकिस्तानबीच समूह चरण, सुपर फोर हुँदै फाइनलमा गरि तीन पटक भिड्ने सम्भावना छ । विश्वकपमा पाकिस्तान र भारत उपाधिको दाबेदार टोलीको रुपमा समेत रहनेछन् । विश्वमा सवैभन्दा बढी महत्वका साथ यी दुई देशबीचको खेल हेरिनेछ ।

२०१९ को विश्वकपमा पाकिस्तान भारतसँग डकवर्थ लेविस पद्धतिको आधारमा ८९ रनले पराजित भएको थियो । पाकिस्तानले एकदिवसीय विश्वकप इतिहासमा भारतलाई हराउन सकेको छैन । भारत घरेलु मैदानमा त्यो विरासत निरन्तरता दिन चाहन्छ । उत्कृष्ट तीव्र गतिको बलिङ आक्रामण भएको पाकिस्तान त्यो इतिहास तोड्दै भारतलाई घरेलु मैदानै स्तब्ध पार्ने सोचमा हुनेछ ।

विश्वकपमा भारत र पाकिस्तानबीच कुल ७ खेल भएका छन् । सबै खेलमा भारत विजयी भएको छ । टि२० विश्वकपमा यी दुई देशबीच ७ खेल हुँदा भारत ५ खेलमा विजयी, १ खेलमा हार र १ खेल नतिजा विहीन छ ।

आइसिसीको च्याम्पियन्स ट्रफीमा भने ५ खेलमा भारत २ मा जित र ३ मा हार व्यहोरेको छ । २०१७ मा सम्पन्न च्याम्पियन्स ट्रफीको फाइनलमा पाकिस्तानले भारतलाई १ सय ८० रनको फराकिलो अन्तरले पराजित गर्दै उपाधि जितेको थियो ।

त्यसपछि भने च्याम्पियन्स ट्रफी नगर्ने आइसिसीले जनाएको थियो । तर २०२५ मा पाकिस्तानदेखी पुन च्याम्पियन्स ट्रफी सुरु हुनेछ । भारत पाकिस्तान जान्छ वा जादैन निकै महत्वपूर्ण रहनेछ ।

आगमी सेप्टेम्बरमा भारत पाकिस्तान नजोने भएपछि उसले खेल्ने सबै खेल श्रीलंकामा हुनेछन् । टि२० विश्वकप २०२१ मा पाकिस्तानले भारतलाई १० विकेटले हराएको थियो । टि२० क्रिकेटमा भारतले कुनैपनि टोलीसँग १० विकेटले पराजित भएको पहिलो घटना थियो । २०२२ को टि२० विश्वकपमा भने भारतले पाकिस्तानलाई ५ विकेटले हराएको थियो ।

विश्वकप ४६ दिनसम्म भारतका १० क्रिकेट रंगशालामा चल्नेछन् । कुल ४८ खेल हुनेछन् । १० टोली सहभागी प्रतियोगिता शीर्ष चार टोली सेमिफाइनल खेल्नेछन् । शीर्ष र चौथो स्थानको टोलीले पहिलो सेमिफाइनल खेल्नेछन् । दोस्रो र तेस्रो स्थानमा रहने टोलीले दोस्रो सेमिफाइनल खेल्नेछन् ।

पहिलो सेमिफाइनल १५ नोभेम्बर र दोस्रा १६ नोभेम्बरमा हुनेछ । सेमिफाइनलको भने रिजर्भ डे राखिएको छैन । फाइनल १९ नोभेम्बरमा हुनेछ । विश्वकप भारतको हैदराबाद, अहमदाबाद, धर्मशाला, दिल्ली, चेन्नई, लखनऊ, पुणे, बंगलोर, मुम्बई र कोलकातामा हुनेछ ।