काठमाडौं (हाम्रो खेलकुद) – नेपालले आइसिसी विश्वकप छनोट अन्तर्गत प्लेअफ खेलमा आज युएईसँग खेल्दैछ । खेल नेपाली समय अनुसार दिउँसो १२: ४५ मा हरारेमा रहेको ताकाशिंगा स्पोर्ट्स क्लबमा सुरु हुनेछ ।

एसोसिएट यी दुई चर्चित टोलीबीचको भिडन्त निकै कडा हुने अनुमान गरिएको छ । नेपालको रोहित पौडेल र युएईको मोहम्मद वासिमले कप्तानी गर्नेछन् । यस खेलको विजेता टोलीले सातौं स्थानको लागि आयरल्यान्डसँग प्रतिस्पर्धा गर्नेछ । पराजित हुने टोलीले नवौं स्थानको लागि अमेरिकासँग प्रतिस्पर्धा गर्नुपर्ने हुन्छ ।

नेपाल युएईलाई हराउँदै टेस्ट टोली आयरल्यान्डसँग प्रतिस्पर्धा गर्न चाहन्छ । तर लगातार नेपालसँगको हारले टोलीमा व्यापक परिवर्तन गरेको युएईलाई विदेशी भूमिमा हराउन यो पटक सहज हुने छैन ।

युएईले अभ्यास खेलमा नेपाललाई ३ विकेटले हराएको थियो । पछिल्लो समय युएई नेपालसँग लगातार पराजित हुँदै आएको छ । त्यसैको कारण टोलीमा युवा खेलाडीलाई बढी महत्व दिँदै विश्वकप छनोट खेल्न पुगेको थियो ।

युएईको टोली फेरिएको छ । युएईको टोलीमा १७ वर्षीय युवा ब्याटर एथान डि सोल्झा, अली नासिर, अर्यांश शर्मा, तीव्र गतिका बलर मोहम्मद जवादुल्लाह र सन्चित शर्मा जस्ता खेलाडी छन् ।

यी युवा खेलाडीले नेपाललाई निराश बनाउन सक्छन् । युवा तीव्र गतिका बलिङ अलराउन्डर अली नासिरको प्रदर्शन निकै महत्वपूर्ण हुनेछ । नासिरले ब्याटिङ र बलिङ दुबैमा उत्कृष्ट प्रदर्शन गर्दै आएका छन् । वेस्टइन्डिजविरुद्ध डेब्यूको सुरुवाती दुई खेलमा अर्धशतक प्रहार गरेका थिए ।

युएईका मध्यक्रमका ब्याटर आसिफ खानको नेपालविरुद्ध धेरै राम्रो इतिहास छ । उनले आइसिसी विश्वकप लिग २ मा ४१ बलमै नेपालविरुद्ध शतक हानेका थिए । आसिफको नेपालविरुद्ध औसत ६१.८० छ ।

नेपालविरुद्ध ६ खेलमा उनले १ शतक र २ अर्धशतकसहित कुल ३ सय ९ रन बनाएका छन् । आसिफ विष्फोटक ब्याटिङका लागि चर्चित एसोसिएट ब्याटर हुन् । उनको विकेट र प्रदर्शन नेपालको लागि निकै महत्वपूर्ण हुनेछ ।

उता कप्तान मोहम्मद वासिमको विकेट खेलमा निर्णायक बन्नसक्छ । विष्फोटक ब्याटर वासिम धेरै समय क्रिजमा टिके सहजै जित दिलाउन सक्छन् । उनको विकेट समयमा लिन सके नेपाल हाबी हुनसक्छ । युएईको ब्याटिङ उनीमाथि निर्भर देखिन्छ ।

अरविन्द वृत्य अर्का युएईका ब्याटर हुन् । जसले नेपालविरुद्ध लगातार राम्रो प्रदर्शन गर्दै आएका छन् । युवा भरपर्दा ब्याटर वृत्य ठूलो इनिङको लागि चिनिन्छन् । वृत्य, आसिफ र वासिम युएईका प्रमुख हतियार हुन् । युएईको मध्यक्रम र तल्लोक्रम भने कमजोरीको रुपमा रहेको छ ।

युएईको तीव्र गतिको बलिङ आक्रामण भने उत्कृष्ट छ । अली नासिर, जहुर खान, सन्चित शर्मा र जुनैद सिद्दिकलाई मैदान उतार्ने सम्भावना छ । जिम्बावेको पिच तीव्र गतिका बलर सहयोगी छ ।

नेपालले जिम्बावे भ्रमणमा शर्ट बलमा ठूलो संघर्ष गरेको छ । मुख्य कमजोरी नै शर्ट बल र बाउन्सर खेल्न नसक्ने देखिएकोछ । यो कमजोरीमाथि युएई पनि फाइदा उठाउन सक्छ । त्यसैले नेपाली ब्याटरले सचेत हुँदै खेल्नुपर्छ । युएईको तीव्र गतिको बलिङ आक्रामण उत्कृष्ट हुँदा त्यसको भरपूर्ण फाइदा उठाउन सक्छ । टियु स्पिनर सहयोगी हुँदा युएईको बलिङ केहि कमजोर देखिएको थियो ।

स्पिनरमा आयन खान र रोहन मुस्तफा हुनेछन् । यी दुई स्पिनरले नेपाली ब्याटरलाई लगातार दबाबमा राख्दै आएका छन् । आयन खान नेपाली ब्याटरलाई घातक बन्न सक्छन् । मुस्तफा खेल मात्रै होईन आफ्नो व्यवहारबाट पनि नेपाली खेलाडीको ध्यान भङ्ग गर्दै आएका छन् । नेपाली ब्याटर उनीदेखी आफैं सचेत हुनुपर्छ ।

यता नेपालले टोलीमा केहि परिवर्तन गर्न सक्छ । यो प्रतिष्ठाको लडाई मात्रै हुँदा नेपालले आरिफ शेख र कुशल मल्ललाई विश्राम दिनसक्ने अनुमान गरिएको छ । नेपालले विकेटकिपर अर्जुन साउद र तीव्र गतिका बलर किशोर महतोलाई मौका दिनसक्छ ।

आसिफ शेखले विकेटकिपरमा त्यति राम्रो प्रभाव जमाउन सकेका छैनन् । ओपनरमा कुशल भुर्तेलसँग उनलाई निरन्तरता दिने देखिन्छ । तर विकेटकिपरमा नेपालले अर्जुनलाई मौका दिनसक्छ । अर्जुनले विकेटकिपरमा राम्रो छाप छोड्दै आएका छन् ।

उता किशोर महतोलाई नेपालले डेथ ओभरमा हेर्नेछ । डेथ ओभर नेपालको कमजोरीको रुपमाछ । नेपालको टोलीमा अन्य परिवर्तनको सम्भावना छ । युएईविरुद्ध गुलशन झाले राम्रो प्रदर्शन गर्दै आएका छन् । गुलशनले युएईविरुद्ध ७ खेलमा २ अर्धशतकसहित २ सय १४ रन बनाउनुको साथै ७ विकेट लिएका छन् ।

आइसिसी विश्वकप लिग २ को अन्तिम खेलमा ५० र एसिसी प्रिमियर कपको फाइनलमा ६७ गरि गरि पछिल्ला दुई खेलमा लगातार अर्धशतक प्रहार गर्दै नटआउट थिए ।

त्यस्तै भीम सार्कीले युएईविरुद्ध राम्रो प्रदर्शन गर्दै आएका छन् । ४ खेलमा २ अर्धशतकसहित कुल २ सय २ रन बनाएका छन् । ललितको युएईविरुद्ध झनै राम्रो प्रदर्शन छ । ९ खेलमा १४ विकेट लिएका छन् । जसमा पछिल्ला दुई खेलमा ९ विकेट छ ।

नेपाल ओपनरबाट राम्रो सुरुवात चाहन्छ । पहिलो खेलमा कुशल र आसिफले जिम्बावेविरुद्ध १ सय ७१ रनको सानदार शतकीय साझेदारी गरेका थिए । त्यसपछि राम्रो गर्न सकेनन् ।

बिना दबाबको खेल हुँदा ओपनरले राम्रो सुरुवात दिने अनुमान गरिएको छ । नेपालका कप्तान रोहित पौडेल र दीपेन्द्रको प्रदर्शन निकै महत्वपूर्ण हुनेछ । तीव्र गतिको बलिङ आक्रामणमा करण केसी, किशोर महतो र गुलशन झा हुनेछन् । करणले नयाँ बलको साथ उत्कृष्ट प्रदर्शन गर्दै आएका छन् । नेपाल करणबाट ड्रिम सुरुवात चाहन्छ । करणलाई स्पिनर ललितले नयाँ बलको साथ साथ दिनेछन् ।

स्पिनर सन्दीप लामिछानेले यस प्रतियोगितामा ४ खेलमा ३ विकेट लिएका छन् । उनी प्रमुख बलर हुँदा नेपालले आजको खेलमा अपेक्षा उच्च राख्नेछ । पार्टटाइम स्पिनरमा दीपेन्द्र हुनेछन् ।

नेपाल समूह ए बाट ४ खेलमा ३ मा हार र १ मा जितसहित २ अंकका साथ चौथो स्थानमा रहेर बाहिरिएको थियो । नेपाल जिम्बावेसँग ८ विकेट, वेस्टइन्डिजसँग १ सय १ र नेदरल्यान्ड्ससँग ७ विकेटले पराजित भएको थियो ।

नेपालले अमेरिकालाई ६ विकेटले हराएको थियो । युएई समूह बी मा चारै खेलमा हारका साथ पुछारमा रहेर बाहिरिएको थियो । युएई श्रीलंकासँग १ सय ७५, ओमानसँग ५ विकेट, स्कटल्यान्डसँग १ सय ११ र आयरल्यान्डसँग १ सय ३८ रनले पराजित भएको थियो । मध्यक्रमर र तल्लोक्रम ब्याटिङ समस्या युएईलाई पुन भारी परेको थियो ।

युएई लक्ष्य पछ्याउँदा संघर्ष गर्दै आएको छ । नेपाल र युएईको टोलीमा युवा खेलाडीको बाहुल्यता छ । त्यसैले यो खेल अझ हेर्न लायक हुनेछ ।

हेड टु हेड :

नेपाल र युएईबीच कुल १४ खेल भएको छ । जसमा नेपाल ८ मा विजयी र ६ खेलमा पराजित भएको छ । पछिल्ला पाँच खेलमा नेपाल ४ खेलमा विजयी भएको छ ।

नेपालको टोली :

कुशल भुर्तेल, आसिफ शेख (विकेटकिपर), ज्ञानेन्द्र मल्ल, रोहित पौडेल (कप्तान), कुशल मल्ल, आरिफ शेख, दीपेन्द्रसिंह ऐरी, गुलशन झा, करण केसी, सन्दीप लामिछाने, भीम सार्की, प्रतिश जि।सी, ललित राजवंशी, अर्जुन साउद र किशोर महतो ।

युएईको टोली :

मोहम्मद वासिम (कप्तान), इथान डी सोल्झा, अली नासिर, वृत्य अरविन्द, रमिज शाहजाद, मोहम्मद जवादुल्लाह, आसिफ खान, रोहन मुस्तफा, आयन खान, जुनैद सिद्दिक, जहुर खान, सन्चित शर्मा, अर्यांश शर्मा, कार्तिक मयाप्पन र बासिल हामिद ।