एजेन्सी – घरेलु टोली जिम्बावेले आइसिसी विश्वकप छनोटको सुपर सिक्स खेलमा श्रीलंकालाई विश्वकपमा पुग्न १ सय ६६ रनको मध्यम लक्ष्य दिएकोछ । क्विन्स स्पोर्ट्स क्लबम टस हारेर पहिला ब्याटिङको निम्तो पाएको जिम्बावे ३२.२ ओभरमा १ सय ६५ रनमा अल आउट भयो ।

जिम्बावेका सन विलियम्सले ५७ बलमा ६ चौका र १ छक्कासहित सर्वाधिक ५६ रनमा आउट भए । सिकन्दर राजा ५१ बलमा ३ चौका र १ छक्कासहित ३१, रायन बर्ल १६ र क्रेग इर्विन १४ रनमा आउट भए । जिम्बावेका कुनैपनि ब्याटरले राम्रो प्रदर्शन गर्न सकेनन् ।

बायाँ हाते तीव्र गतिका बलर दिलशान मदुशानकाले सानदार सुरुवात दिलाएपछि जिम्बावे खेलमा दबाबमा परेको थियो । दीलशानले ओपनर जयलोर्ड गुम्बेले शून्यमा पेभेलिएन फर्काए ।

उनले नै कप्तान इर्विनलाई कुशल मेन्डिसबाट पेभेलिएन फर्काएका थिए । दिलशानकै बलमा युवा ब्याटर वेस्ली वेल्सी मधेभेरे दाशुन शानकाबाट १ रनमा क्याच आउट भएपछि ३०-३ को अवस्थामा पुगेको थियो ।

चौथो विकेटका लागि सिकन्दर राजा र सन विलियम्सले ६८ रनको साझेदारी गर्दै खेलमा फर्काएका थिए । तर राजा शानकाको बलमा मदुशानकाबाट क्याच भएपछि लगातार विकेट गुमाएको थियो ।

श्रीलंकाका स्पिनर महेश थिक्सेनाले ८.२ ओभरमा २५ रन खर्चेर सर्वाधिक ४ विकेट लिए । दिलशान मदुशानकाले ५ ओभरमा १५ रन खर्चेर ३ विकेट लिए । पथिसा पाथिरानाले दुई र दाशुन शानकाले समान एक विकेट लिए । श्रीलंका यस खेलमा विजयी भएमा ८ अंक हुनेछ । ८ अंक हुँदा आगमी अक्टोबर नोभेम्बरमा भारतमा हुने विश्वकप खेल्न पाउनेछ ।

पराजित भएमा जिम्बावेले अन्तिम खेलमा वेस्टइन्डिजलाई हराउनु पर्ने हुन्छ । जिम्बावे विजयी भएमा भने स्कटल्यान्डसँगको नतिजा पखर्नु पर्ने हुन्छ । स्कटल्यान्ड पनि ८ अंकमा पुग्न सक्ने समिकरण छ ।