काठमाडौं (हाम्रो खेलकुद) – नेपाली युवा टोलीले मलेसियामा जारी एसिसी यू-१६ इस्ट जोन कपको सेमिफाइनल खेलमा आज सिंगापुरसँग खेल्दैछ । खेल नेपाली समय अनुसार बिहान ७ : १५ मा बायोमास ओभल क्रिकेट मैदानमा सुरु हुनेछ ।

नेपाल समूह ए को विजेता र सिंगापुर समूह बी को उपविजेताको रुपमा सेमिफाइनलमा प्रतिस्पर्धा गर्न लागेका हुन् । नेपालले समूह चरणमा थाईल्यान्डलाई २ सय २५ रन र मलेसियालाई ८४ रनले हराएको थियो ।

उता सिंगापुरले इन्डोनएसियालाई १ सय ४ र माल्दिभ्सलाई २ सय ४५ रनले हराएको थियो । सिंगापुर हङकङसँग भने ७ विकेटले पराजित भएको थियो ।

थाईल्यान्डलाई हराउन नेपालका ओपनर निरज यादले ७४ रन बनाउदा स्पिनर सन्तोष यादवले पाँच विकेट लिएका थिए । मलेसियालाई हराउन अशोक धामीले ५२ रन बनाउनुको साथै ४ विकेट लिएका थिए । नेपालका ओपनर निरज यादव र सुर्यांशु कोइराला प्रमुख ब्याटर हुन् ।

नरेन भट्टले पनि दुबै खेलमा राम्रो प्रदर्शन गरेका छन् । कप्तान अभिषेक तिवारी र प्रतिक पोखरेल तीव्र गतिका बलर हुन् । नेपालको टोली सन्तुलित देखिएको छ । उता सिंगापुरका श्रेयान चयौ २ खेलमा १ शतक र १ अर्धशतकसहित २सय ७ रन बनाएका छन् ।

उनको विकेट नेपालको लागि निकै महत्वपूर्ण हुने देखिन्छ । उनले माल्दिभ्सविरुद्ध १ सय २९ रनको शतकीय इनिङ खेलेका थिए । त्यस्तै रोशन रविचन्द्रन, रियान नैक र हरि हारयानले पनि यस प्रतियोगितामा राम्रो ब्याटिङ गरेका छन् । हर्ष वेंकटराम सिंगापुरका प्रमुख बलर हुन् ।

त्यस्तै अर्को सेमिफाइनल खेलमा हङकङ र मलेसियाबीच प्रतिस्पर्धा हुनेछ । फाइनल खेल मंगलबार हुनेछ । यदि नेपाल सेमिफाइनलमा पराजित भएमा तेस्रो स्थानको लागि मंगलबार नै प्रतिस्पर्धा गर्नेछ ।