एजेन्सी – जिम्बावेमा जारी आइसिसी विश्वकप छनोटबाट श्रीलंका एक खेल अगावै आगमी अक्टोबर नोभेम्बरमा भारतमा हुने विश्वकपमा पुगेको छ । सुपर सिक्सबाट अव तीन टोली मध्य एक मात्रै विश्वकपमा पुग्न सक्छन् । जिम्बावे, स्कटल्यान्ड र नेदरल्यान्ड्स मध्य एक टोलीले विश्वकप खेल्नेछ ।

समान दुई पटक एकदिवसीय र टि२० विश्वकप विजेता वेस्टइन्डिज भने सुपर सिक्सबाटै बाहिरिएको छ । सुपर सिक्सबाट ओमान पनि औपचारिक रुपमा बाहिरिएको छ । विश्वकपमा पुग्ने जिम्बावेको उच्च सम्भावना छ । विश्वकपमा पुग्न तीन टोलीको समिकरण यस प्रकार छ ।

१. जिम्बावे

जिम्बावे सुपर सिक्समा ४ खेलमा ३ मा जित र १ मा हारसहित ६ अंकका साथ दोस्रो स्थानमा छ । जिम्बावेले आफ्नो अन्तिम खेल मंगलबार स्कटल्यान्डसँग खेल्नेछ । उक्त खेलमा विजयी भएमा जिम्बावे ८ अंकका साथ सोझै विश्वकपमा पुग्नेछ ।

तर यदि जिम्बावे पराजित भएमा भने अन्य टोलीको साथ लिनुपर्ने हुन्छ । उक्त खेलमा स्कटल्यान्ड विजयी भएमा ६ अंक पुग्नेछ । विहीबार स्कटल्यान्डले नेदरल्यान्ड्ससँग खेल्नेछ । यदि जिम्बावे पराजित भएको खण्डमा विहीबार नेदरल्यान्ड्सले स्कटल्यान्डलाई हराउनु पर्ने हुन्छ । त्यसो हुँदा ६-६ अंक हुन्छ । नेटरनरेटमा माथि रहँदै विश्वकपमा पुग्नेछ ।

२. स्कटल्यान्ड

स्कटल्यान्ड ३ खेलमा २ मा जित र १ मा हारका साथ ४ अंकका साथ तेस्रो स्थानमा छ । स्कटल्यान्ड विश्वकपमा पुग्न बाँकी दुबै खेल नेदरल्यान्ड्स र जिम्बावेविरुद्ध खेलको जित पर्याप्त हुनेछ । यदि जिम्बावेसँग पराजित भएको खण्डमा भने विश्वकप सपना स्कटल्यान्डको समाप्त हुनेछ ।

जिम्बावेलाई पराजित गरेर नेदरल्यान्ड्ससँग हार्दा नेटरनरेटको कारण विश्वकप खेल्न सक्छ । स्कटल्यान्डले जिम्बावेलाई हराउन बाहेक अन्य कुनै विकल्प छैन ।

३. नेदरल्यान्ड्स

नेदरल्यान्ड्स ३ खेलमा १ मा जित र २ मा हारका साथ चौथो स्थानमा छ । नेदरल्यान्ड्स बाँकी दुबै खेल ओमान र स्कटल्यान्डसँग विजयी भएमा ६ अंकमा पुग्न सक्छ । पहिला नेदरल्यान्ड्सले दुबै खेल जित्नुपर्छ । एउटा खेलमा पराजित हुँदा पनि बाहिरिन्छ ।

आफूले जितेर मात्रै हुँदैन । उता स्कटल्यान्डले जिम्बावेलाई पनि हराउनै पर्ने हुन्छ । यदि जिम्बावेले हारेको खण्डमा मात्रै तीनै टोलीको ६ अंक हुनसक्छ । आफ्नो दुई खेलमा फराकिलो जित हात पार्न सके नेटरनरेटमा माथि रहँदै विश्वकपमा पुग्न सक्छ ।