एजेन्सी – जिम्बावेमा जारी आइसिसी विश्वकप छनोटमा नेपाल आठौं स्थानमा रहेर बाहिरिएको छ । सातौं स्थानको लागि आयरल्यान्डसँग दुई विकेटले पराजित भएपछि नेपाल आठौं बन्दै बाहिरिएको छ ।

नेपाल समूह ए बाट ४ खेलमा ३ मा हार र १ मा जित सहित चौथो स्थानमा रहेर बाहिरिएको थियो । नेपालले अमेरिकालाई ६ विकेटले हराएको थियो । समूह चरणमा नेपालको त्यो एकमात्रै जित थियो ।

जिम्बावेसँग ८ विकेट, वेस्टइन्डिजसँग १ सय १ र नेदरल्यान्ड्ससँग ७ विकेटले पराजित भएपछि सुपर सिक्समा पुग्न सकेको थिएन । नेपालले प्लेअफ खेलमा युएईलाई तीन विकेटले हराएको थियो ।

जिम्बावेमा जारी विश्वकप छनोटमा श्रीलंकाले भारतमा हुने विश्वकपको टिकट पक्का गरेको छ । चार मध्य तीन टेस्ट टोली वेस्टइन्डिज, आयरल्यान्ड र जिम्बावे भने विश्वकपमा पुग्न सकेनन् । अव नेदरल्यान्ड्स र स्कटल्यान्ड मध्य एक टोली विश्वकपमा पुग्नेछन् ।

बिहीबार स्कटल्यान्ड र नेदरल्यान्ड्सबीच प्रतिस्पर्धा हुनेछ । उक्त खेलमा स्कटल्यान्ड विजयी भएमा विश्वकपमा पुग्नेछ । तर स्कटल्यान्ड पराजित भएमा नेदरल्यान्ड्सको नेटरनरेटमा भरपर्नेछ । नेदरल्यान्ड्सको नेटरनरेट माइनस ०.०४२ र स्कटल्यान्डको ०.२६९ छ । स्कटल्यान्ड ४ खेलमा ३ मा जित र १ मा हारसहित ६ अंकका साथ दोस्रो स्थानमा छ । नेदरल्यान्ड्स ४ खेलमा २ मा जित र २ मा हारसहित ४ अंकका साथ चौथो स्थानमा छ ।