एजेन्सी – जिम्बावेमा जारी आइसिसी विश्वकप छनोटबाट चार मध्य तीन टेस्ट टोलीले नै विश्वकपमा स्थान बनाउन नसकी बाहिरिएका छन् । एसोसिएट टोली नेदरल्यान्ड्स र स्कटल्यान्डको सानदार प्रदर्शनपछि दुई पटकको विश्वकप विजेता वेस्टइन्डिज, घरेलु टोली जिम्बावे र आयरल्यान्ड विश्वकपमा पुग्न नसकेका हुन् ।

श्रीलंका विश्वकप २०२३ मा छनोटबाट पुग्ने एक मात्रै टेस्ट टोली बन्यो । आयरल्यान्ड समूह बी बाटै बाहिरिएको थियो । वेस्टइन्डिज र जिम्बावे सुपर सिक्सबाट बाहिरिएका हुन् । घरेलु टोली जिम्बावे अप्रत्याशित रुपमा बाहिरिन पुग्यो । जिम्बावे समूह चरणबाट ४ अंकका साथ सुपर सिक्समा आएको थियो । सुपर सिक्समा तीन मध्य दुई जित जिम्बावेलाई विश्वकपमा पुग्न पर्याप्त हुन्थ्यो ।

तर सुपर सिक्समा श्रीलंकासँग ९ विकेट र स्कटल्यान्डसँग ३१ रनले पराजित भएपछि विश्वकप सपना समाप्त भएको हो । त्यसअघि समूह चरणमा नेपाललाई ८ विकेट, नेदरल्यान्ड्सलाई ६ विकेट, वेस्टइन्डिजलाई ३५ रन र अमेरिकालाई ३ सय ४ रनले हराएको थियो ।

उता वेस्टइन्डिज दुई खेल अगावै बाहिरियो । सन् १९७५ र १७७९ को विश्वकप विजेता सुपर सिक्समा अंक विहीन हुँदै आएको थियो । समूह चरणमा नेपाललाई १ सय १ रन र अमेरिकालाई ३९ रनले हराएको थियो ।

तर यी दुबै टोली सुपर सिक्समा पुग्न नसकेपछि अंक विहीन हुँदै सुपर सिक्स खेल्नु परेको थियो । नेदरल्यान्ड्ससँग सुपर ओभर र जिम्बावेसँग ३५ रनको हार भारी पर्यो । सुपर सिक्समा वेस्टइन्डिज स्कटल्टल्यान्डसँग ७ विकेटले पराजित भएपछि दुई खेल अगावै बाहिरिएको हो ।

उता आयरल्यान्ड समूह चरणमा ओमानसँग ५ विकेट, स्कटल्यान्डसँग एक विकेट, श्रीलंकासँग १ सय ३३ रनले पराजित भएको थियो । युएईलाई १ सय ३८ रनले हराएको थियो ।

प्लेअफमा अमेरिकालाई ६ विकेट र नेपाललाई २ विकेटले हराउँदै सातौं स्थानमा रहेर बाहिरियो । अव नेदरल्यान्ड्स र स्कटल्यान्ड मध्य एक टोली विश्वकप खेल्नेछन् ।