काठमाडौं (हाम्रो खेलकुद) – नरेन भट्टले नेपाली यू-१६ क्रिकेटमा ६ वर्ष देखीको शतकको खडेरी तोडेका छन् । एसिसी इस्ट जोन कपको फाइनलमा मलेसियालाई २ सय २१ रनले हराउनेक्रममा नरेनले शतक हानेका थिए ।

मलेसियाको बायोमास ओभल क्रिकेट मैदानमा टस जितेर पहिला ब्याटिङको निम्तो पाएको नेपालले निर्धारित ३५ ओभरमा ८ विकेट गुमाउँदै २ सय ५२ रन बनाएको थियो ।

नेपालका नरेन भट्टले ८९ बलमा १० चौका र २ छक्कासहित १ सय १२ रनको शतकीय इनिङ खेले । जारी प्रतियोगितामा शतक हान्ने उनी नेपालको एकमात्रै खेलाडी थिए । उनी २०१७ मा रित गौतमले शतक हानेपछि नेपाली यू१६ का शतकधारी हुन् ।

कप्तान रित गौतमले म्यानमारविरुद्ध ७८ बलमा १२ चौकासहित १ सय ६ रनको शतकीय इनिङ खेलेका थिए । रितपछि अन्य कुनैपनि नेपाली यू१६ खेलाडीले शतक हानेका थिएनन् ।

रित नेपाली क्रिकेटमा यू-१६ र यू-१९ दुबैमा शतक हान्ने एक्लो खेलाडी हुन् । रितले २०१९ मा इस्टर्न रिजन क्रिकेटमा सिंगापुरविरुद्ध १ सय १५ रनको शतकीय इनिङ खेलेका थिए । नेपाली यू-१६ टोलीले लगातार तेस्रो पटक उपाधि जितेको हो ।

यसअघि नेपालले थाईल्यान्डमा सम्पन्न दुई एसिसी यू-१६ इस्टर्न रिजनको उपाधि जितेको थियो । नेपालले २०१७ मा रित गौतम र २०१९ मा विशाल विक्रम केसीको कप्तानीमा यू१६ को उपाधि जितेको थियो । २०१९ को फाइनलमा नेपालले मलेसियालाई ५९ रनले हराउँदै उपाधि जितेको थियो ।

२०१७ को फाइनलमा नेपालले सिंगापुरलाई ७१ रनले हराउँदै उपाधि जितेको थियो । एसिसीले यसअघि यू१६ को प्रतियोगिता इस्टर्न रिजनको नामबाट आयोजना गर्दै आएको थियो । तर यस पटक भने उक्त नाम परिवर्तन गर्दै इस्ट जोन कप राखेको थियो ।