एजेन्सी – आइसिसी विश्वकप छनोट अन्तर्गत सुपर सिक्स खेलमा विश्वकपमा पुग्न आज नेदरल्यान्ड्स र स्कटल्यान्डले निर्णायक खेल खेल्दैछन् । दुई एसोसिएट टोलीबीचको महत्वपूर्ण खेल १२ : ४५ मा बुलावायोमा सुरु हुनेछ ।

आजको विजेता टोली विश्वकपमा पुग्ने समिकरण छ । स्कटल्यान्ड ४ खेलमा ३ मा जित र १ मा हारसहित ६ अंकका साथ दोस्रो स्थानमा छ । नेदरल्यान्ड्स ४ खेलमा २ मा जित र २ मा हारसहित ४ अंकका साथ चौथो स्थानमा छ ।

स्कटल्यान्ड विजयी हुँदा ८ अंकका साथ विश्वकपमा पुग्नेछ । नेदरल्यान्ड्स विजयी हुँदा नेनरनरेटमा माथि रहँदै विश्वकपमा पुग्ने देखिन्छ । नेदरल्यान्ड्सको जितको अन्तर भने केहि फराकिलो हुनुपर्छ । अन्यथा नेदरल्यान्ड्स जितको बाबजुद विश्वकपमा नपुग्न सक्छ ।

नेदरल्यान्ड्सको नेटरनरेट माइनस ०.०९९ र स्कटल्यान्डको प्लस ०.२६९ छ । नेदरल्यान्ड्स विश्वकपमा पुग्न झिनो अन्तर भने पर्याप्त नहुनसक्छ ।

स्कटल्यान्ड चौथो पटक विश्वकपमा पुग्न चाहन्छ । स्कटल्यान्डले १९९९, २००७ र २०१५ मा एकदिवसीय विश्वकप खेलेको थियो । नेदरल्यान्ड्सले १९९६, २००३, २००७ र २०११ मा विश्वकप खेलेको थियो । नेदरल्यान्ड्स १२ वर्ष र स्कटल्यान्ड ८ वर्षपछि विश्वकप खेल्ने सोचमा छन् ।

स्कटल्यान्डले समूह चरणमा आयरल्यान्डलाई एक विकेट, युएईलाई १ सय ११ र ओमानलाई ७६ रनले पराजित गरेको थियो । श्रीलंकासँग ८२ रनले पराजित भएको थियो । सुपर सिक्समा जिम्बावेलाई ३१ रन र वेस्टइन्डिजलाई ७ विकेटले हराउँदै विश्वकप नजिक पुगेको हो ।

उता नेदरल्यान्ड्सले समूह चरणमा अमेरिकालाई ५ विकेट, नेपाललाई ७ विकेट र वेस्टइन्डिजलाई सुपर ओभरमा हराएको थियो । जिम्बावेसँग ६ विकेटले पराजित हुन पुगेको थियो । सुपर सिक्समा श्रीलंकासँग २१ रनले पराजित हुँदा ओमानलाई डकवर्थ लेविस पद्धतिको आधारमा ७४ रनले हराएको थियो ।

स्कटल्यान्डका क्रिस सोल र ब्रेन्डन म्याकमुलेनको तीव्र गतिको बलरको जोडीले सानदार प्रदर्शन गरेका छन् । जिम्बावे र वेस्टइन्डिजलाई हराउन यी दुई बलरले सानदार प्रदर्शन गरेका थिए । क्रिस सोल प्रतिघण्टा १ सय ५० को रफ्तारमा बलिङ गर्ने गर्दछन् ।

उनीको गति नेदरल्यान्ड्सका ब्याटरलाई निराश बनाउन सक्छ । म्याकमुलेनले पनि नयाँ बलका साथ सानदार प्रदर्शन गर्दै आएका छन् । यी दुई बलरको प्रदर्शन निकै महत्वपूर्ण हुनेछ । म्याकमुलेन अलराउन्डर हुन् । तेस्रो नम्बरमा उत्कृष्ट प्रदर्शन गर्दै आएका छन् ।

उनले ओमानविरुद्ध १ सय ३६ रनको सानदार शतकीय इनिङ खेलेका थिए । त्यस्तै वेस्टइन्डिजसँग ६९ र जिम्बाबेविरुद्ध ३४ रन जोडेका थिए । स्कटल्यान्ड उनीबाट त्यस्तै म्याच विनिङ अलराउन्ड प्रदर्शन चाहन्छ । तेस्रो तीव्र गतिका बलरमा शफ्यान शरिफ हुनेछन् ।

म्याथ्यु क्रस, रिची बेरिंग्टन र जर्ज मुन्शे जस्ता अनुभवी ब्याटरले स्कटल्यान्डको ब्याटिङ मजबुत बनेको छ । तल्लोक्रममा क्रिस ग्रेभ्स, माइकल लिस्क र मार्क वाट हुनेछन् । लिस्क स्कटल्यान्डका फिनिसर हुन् । स्पिनर मार्क वाट र क्रिस ग्रेभ्सको जोडीले पनि सानदार प्रदर्शन गर्दै आएका छन् ।

उता नेदरल्यान्ड्सको तीव्र गतिको बलिङ आक्रामण त्यतिनै उत्कृष्ट छ । लोगन भान बिक र रायन केलिनबाट सानदार सुरुवात चाहन्छ । यी दुई बलरले पावर प्लेमा उत्कृष्ट प्रदर्शन गर्दै आएका छन् ।

वेस्टइन्डिजले प्रस्तुत गरेको ३ सय ७५ रनको लक्ष्य पछ्याउनेक्रममा खेल टाई बनाउन बिक हिरो बनेका थिए । उनले सुपर ओभरमा जेसन होल्डरलाई ३० रन प्रहार गरेका थिए । नेदरल्यान्ड्सको ब्याटिङ मुख्य हतियार हुन् ।

ओपनर विक्रमजित सिंह, म्याक्स ओडाउड, वेस्ली ब्यारेसी र स्कट एडवार्ड्स जस्ता भरपर्दा ब्याटर टोलीमा छन् । विक्रमजितले पछिल्लो खेलमा ओमानविरुद्ध १ सय १० रनको शतकीय इनिङ खेलेका थिए । उनीबाट त्यो प्रदर्शन चाहन्छ । म्याक्स ओडाउड आक्रामक ब्याटर हुन् । ब्यारेसी टोलीका अनुभवी ब्याटर हुन् ।

स्कट एडवार्ड्स पछिल्ला चार इनिङमा ६७, ६७, ६७ र ४ रनमा आउट भएका छन् । बास डि लिडे, तेजा निडामानिरु, सकिब जुलफिकर र भान बिकले गर्दा ब्याटिङ उत्कृष्ट छ ।

तेजा स्कटल्यान्डलाई हराउन नायक बन्नसक्छन् । भारतीय मुलका तेजाले नेदरल्यान्ड्सबाट फिनिसरको काम गर्दै आएका छन् । वेस्टइन्डिजलाई हराउन उनले शतक हानेका थिए । नेदरल्यान्ड्सको स्पिन आक्रामण तुलनात्मक रुपमा कमजोर छ ।

यी दुई टोलीबीच कडा प्रतिस्पर्धा हुने अनुमान गरिएको छ । ओडिआईमा स्कटल्यान्ड र नेदरल्यान्ड्सबीच कुल ११ खेल भएको छ । जसमा स्कटल्यान्ड ७ खेलमा विजयी हुँदा ३ खेलमा पराजित भएको छ । पछिल्ला पाँच भेटमा स्कटल्यान्ड ४ खेलमा विजयी भएको छ ।

यी दुई एसोसिएट टोलीको सानदार प्रदर्शनको कारण तीन टेस्ट टोली जिम्बावे, आयरल्यान्ड र वेस्टइन्डिज विश्वकपमा पुग्न सकेनन् । श्रीलंका भने विश्वकपमा पुगेको छ । अव विश्वकपमा पुग्ने टोलीले उपाधिको लागि श्रीलंकासँग खेल्नेछ ।