एजेन्सी – स्कटल्यान्डका अलराउन्डर ब्रेन्डन म्याकमुलेनले आइसिसी विश्वकप छनोटको सुपर सिक्स खेलमा विश्वकपमा पुग्न निर्णायक खेलमा नेदरल्यान्ड्सविरुद्ध सानदार शतक हानेका छन् ।

जिम्बावेको क्विन्स स्पोर्ट्स क्लब बुलावायोमा टस हारेर पहिला ब्याटिङको निम्तो पाएको स्कटल्यान्डले ३८ ओभरमा ४ विकेट गुमाउँदै २ सय ३ रन बनाएको छ । कप्तान रिची बेरिंग्टन ६२ बलमा समान २ चौका र छक्कासहित ५० रनमा अविजित छन् । उनलाई माइकल लिस्कले साथ दिनेछन् ।

म्याकमुलेन १ सय १० बलमा ११ चौका र ३ छक्कासहित १ सय ६ रनको सानदार शतकीय इनिङ खेल्दै आउट भए । उनी रायन केलिनको बलमा कट विहान्ड हुन पुगेका थिए ।

उनले १ सय ६ बलमा आफ्नो ओडिआई करिअरको दोस्रो शतक पूरा गरे । यसअघि उनले यसै प्रतियोगितामा युएईविरुद्ध १ सय ३६ रनको सानदार शतकीय इनिङ खेलेका थिए । उनले कप्तान रिची बेरिंग्टनसँग चौथो विकेटका लागि १ सय ३७ रनको सानदार शतकीय साझेदारी गर्दै विशाल योगफलको आधार तय गरेका छन् ।

तीव्र गतिका बलर लोगन भान बिकले पहिलो ओभरको चौथो बलमा ओपनर म्याथ्यु क्रसलाई शून्यमा बोल्ड आउट गरे । दोस्रो विकेटका लागि म्याकमुलेन र क्रिस म्याकब्राइडले ४५ रनको साझेदारी गरेका थिए । म्याकब्राइड बास डि लिडेको सर्ट बलमा पुल खेल्ने धुनमा सर्ट मिडविकेटमा ३२ रनमा बीकबाट क्याच आउट भए । उनले ३६ बलमा ६ चौका प्रहार गरे ।

लिडेकै बलमा जर्ज मुन्शे गल्भ्समा एज लाग्दै विकेटकिपर तथा कप्तान स्कट एडवार्ड्सबाट क्याच आउट भए । स्कटल्यान्ड यस खेलमा विजयी भएमा सोझै विश्वकपमा पुग्नेछ । नेदरल्यान्ड्स विजयी हुदा नेटरनरेटमा निर्भर हुनेछ।