एजेन्सी – ओपनर आसिफ खानको सानदार शतकको सहयोगमा युएईले आइसिसी विश्वकप छनोटको नवौं स्थानको लागि भएको खेलमा अमेरिकामाथि एक रनको नाटकीय जित हात पारेको छ । योसँगै १० टोली सहभागी प्रतियोगितामा युएई नवौं र अमेरिका पुछारमा रहेर बाहिरिएका छन् ।

जितको लागि ३ सय ९ रनको विशाल विजयी लक्ष्य पछ्याएको अमेरिकाले निर्धारित ५० ओभरमा ९ विकेट गुमाउँदै ३ सय ७ रन बनायो । अमेरिकालाई जितको लागि अन्तिम ६ बलमा ११ रन चाहिँएको थियो । सुरुवाती तीन बलमा ७ रन जोडेपछि अन्तिम तीन बलमा चार रन चाहिँएको थियो ।

सन्चित शर्माले ९ रन खर्चेर २ विकेट लिएपछि नाटकीय जित हात पारेको थियो । पहिलो बलमा सन्चित शर्माले केन्जिगेलाई एक रन दिए । दोस्रो बलमा निसर्ग पटेल चौका र तेस्रो बलमा दुई रन बटुले ।

बाँकी तीन बलमा चार रन चाहिँएको थियो । चौथो बलमा पटेल १४ रनमा बोल्ड आउट भए । पाँचौं बलमा अली खानले दुई रन लिए । अन्तिम बलमा अली खान वृत्य अरविन्दबाट क्याच भएपछि हार्न पुगेको थियो ।

अमेरिका आरोन जोन्सले १ सय ३ बलमा ४ चौका र २ छक्कासहित सर्वाधिक ७५ रन बनाए । त्यस्तै मोनांक पटेलले ६६बलमा ३ चौका र १ छक्कासहित ६१ रनमा आउट भए । गजानन्द सिंह ४४ बलमा ८ चौका र २ छक्कासहित ६९ रनमा आउट भए ।

युएईका सन्चित शर्माले ६ ओभरमा ३७ रन खर्चेर ३ विकेट लिए । अली नासिर र जुनैद सिद्दिकले समान दुई विकेट लिए ।
त्यसअघि ताकाशिंगा स्पोर्ट्स क्लबमा टस जितेर पहिला ब्याटिङ रोजेको युएईले निर्धारित ५० ओभरमा ४ विकेट गुमाउँदै ३ सय ८ रन बनायो ।

युएईका ओपनर आसिफ खानले १ सय ४५ बलमा १२ चौका र ६ छक्कासहित १ सय ५१ रनको सानदार शतकीय इनिङ खेले । उनको यो कुनैपनि अन्तर्राष्ट्रिय खेलको उच्च प्रदर्शन हो । ओडिआई करिअरको तेस्रो शतक प्रहार गरेका हुन् ।

कुनैपनि युएईका ब्याटरले ओडिआईमा खेलेको यो उच्च प्रदर्शन हो । यसअघि युएईबाट उच्च प्रदर्शन खुराम खानले २०१४ मा अफगानिस्तानविरुद्ध १ सय ३२ रनको शतकीय इनिङ खेलेका थिए ।

अर्यांश शर्मा ५७ र बासिल हामिद ४४ रनमा आउट भए । पहिलो विकेटका लागि अर्यांश शर्मा र आसिफ खानले २२.३ ओभरमा १ सय ७ रनको शतकीय साझेदारी गरेका थिए । अमेरिकाका अली खानले सर्वाधिक दुई विकेट लिए ।