काठमाडौं (हाम्रो खेलकुद) – नेपालले एसिसी इमर्जिङ कपमा भारत ए विरुद्ध टस जितेर टोलीमा दुई परिवर्तन गरेको छ । श्रीलंकाको आर प्रेमदासा रंगशालामा भएको टसमा नेपालका कप्तान रोहित पौडेलले जितेर पहिला ब्याटिङ गर्ने निर्णय लिएका छन् ।

नेपालले पाकिस्तानसँगको खेलबाट टोलीमा दुई परिवर्तन गरेको छ । तीव्र गतिका बलर किशोर महतो र देव खनाललाई आजको खेलमा मैदान उतारेको छ । नेपालले पाकिस्तानसँगको खेलबाट अर्जुन साउद र प्रतिश जि.सीलाई बेन्चमा राखेको छ ।

नेपालले विकेटकिपर अर्जुन साउदलाई विश्राम दिएको छ । युवा ब्याटर देव खनाललाई मौका दिएको छ । देवले तेस्रो नम्बरमा ब्याटिङ गराउनेछ । नेपालबाट १० ओडिआई खेलमा २ अर्धशतक प्रहार गरेका देव गतवर्ष भदौमा केन्या भ्रमणपछि पहिलो पटक मौका पाएका हुन् । देव ठूलो सम्भावना बोकेका युवा ब्याटर हुन् । यस खेलमा राम्रो गर्न सके उनले नियमित रुपमा मौका पाउन सक्छन् ।

उता प्रतिश जि.सीलाई विश्राम दिएको छ । किशोर महतोलाई उनको स्थानमा मौका दिएको छ । किशोरबाट नेपाल डेथ ओभरमा उत्कृष्ट प्रदर्शन चाहन्छ । कप्तान रोहितले अन्य परिवर्तन भने गरेको छैनन् ।

नेपालको प्लेइङ ११ :

कुशल भुर्तेल, आसिफ शेख, रोहित पौडेल (कप्तान), कुशल मल्ल, पवन सरार्फ , देव खनाल, गुलशन झा, सोमपाल कामी, भीम सार्की, ललित राजवंशी र किशोर महतो ।