काठमाडौं (हाम्रो खेलकुद) – नेपालले एसिसी इमर्जिङ टिम्स एसिया कपमा आफ्नो अन्तिम खेल बुधबार युएई ए विरुद्ध खेल्दैछ । खेल नेपाली समय अनुसार बिहान १०: १५ मा पि सारा ओभल कोलोम्बोमा सुरु हुनेछ ।

समूह बी मा रहेका नेपाल र युएई ए दुबै समूह चरणबाट बाहिरी सकेका छन् । नेपाल पहिलो खेलमा पाकिस्तान ए सँगा ४ विकेट र दोस्रो खेलमा भारत ए सँग ९ विकेटले पराजित भएको थियो । युएई भारतसँग ८ र पाकिस्तानसँग १ सय ८४ रनले पराजित भएको थियो ।

युएईले पहिलो रोजाईका खेलाडी इमर्जिङ टिम्स कपमा पठाएको छ । तर पावर प्लेमा भारत र पाकिस्तानविरुद्ध नेपालले भन्दा युएईले राम्रो सुरुवात गरेका थिए । नेपाल भारतसँग सुरुवाती १० ओभरमा ३७–५ को अवस्थामा थियो ।

युएई भारतविरुद्ध सुरुवाती १० ओभरमा ४८–२ को अवस्थामा थियो । पाकिस्तानविरुद्ध नेपाल सुरुवाती १० ओभरमा ४३–६ को अवस्थामा थियो । युएईले पाकिस्तानविरुद्ध सुरुवाती १० ओभरमा कुनै विकेट नगुमाई ५२ रन जोेडेको थियो ।

युएई ए लाई भन्दा नेपाललाई बढी दबाब हुनेछ । युएईको सिनियर टोलीले नेपालसँग पछिल्लो समय लगातार हार्दै आएको छ । त्यसैले उनीहरुलाई नेपालसँग हार्नु कुनै आश्चर्य हुनेछैन । तर यदि युएई ए ले नेपाललाई हराउँछ भने त्यो उनीहरुको लागि ठूलो उपलब्धी हुनेछ ।

युएई ए को लक्ष्य पनि नेपाललाई नै हराउने हुनेछ । नेपाललाई साखको हिसाबमा पनि जित्नुपर्ने दबाब हुनेछ । युवा खेलाडी नेपालविरुद्ध सानदार प्रदर्शनका साथ सिनियर टोलीमा स्थान बनाउने उर्जाका साथ मैदान उत्रनेछन् ।

युएईले पुरै नयाँ टोलीलाई पठाएकोछ । उनीहरुलाई गुमाउनु केहि छैन । सिक्ने मात्रै हुनेछ । ओपनर अर्यांश शर्मा, जोनाथन फिगी, एथान डि सोल्झा, अश्वन्त वल्थापा र अली नासिर सिनियर टोलीबाट खेलेका खेलाडी हुन् । अर्यांश, सोल्झा र अली नासिर ठूलो सम्भावना भएका युवा खेलाडी हुन् । यी तीन खेलाडीमाथि उत्कृष्ट प्रदर्शनको जिम्मेवारी हुनेछ ।

तीव्र गतिका बलर मोहम्मद जवादुल्लाह, सन्चित शर्मा र मतिउल्लाह खान सिनियर टोलीबाट खेलि सकेका छन् । विश्वकप छनोटमा जिम्बावेमा युएईविरुद्ध नेपाललाई ६३–६ को दयनीय अवस्थामा पुर्याउन मोहम्मद जवादुल्लाहले तीन विकेट लिएका थिए । युएईको तीव्र गतिको बलिङ आक्रामण उत्कृष्ट छ । सन्चित, अली नासिर र मोहममद जवादुल्लाह घातक बन्न सक्छन् ।

सर्ट बल नेपाली ब्याटरको पछिल्लो समय ठूलो कमजोरी बनेको छ । भारत र पाकिस्तानविरुद्ध खराब सुरुवातको मुख्य कारण नै त्यहिँ थियो । युएईका बलरले त्यो कमजोरीको फाइदा उठाउन खोज्नेछन् ।

लेग स्पिनर आदित्य सिठ्ठी नेपाली ब्याटरलाई टाउको दुखाईको बलर बन्न सक्छन् । सर्ट र बाउन्सर बलमा राम्रो गर्न सकेमात्रै नेपालले बलियो योगफल तयार पार्न सक्छ । अन्यथा युएई एसँग नेपालले संघर्ष गर्दै खराब प्रदर्शन नगर्ला भन्न सकिदैन ।

नेपालले अन्तिम खेलमा बेन्चमा रहेका खेलाडीलाई मौका दिनसक्छ । सन्दीप जोरालाई पवन सरार्फको स्थानमा खेलाउन सक्छ । पवन सरार्फ सुरुवाती दुई खेलमा १ र ६ रनमा आउट भएका थिए । युवा ब्याटर सन्दीप जोरालाई फिनिसरको भूमिका दिनसक्छ ।

नेपालले ललितनारायण राजवंशीको स्थानमा सूर्य तामाङलाई मौका दिनसक्ने सम्भावना रहन्छ । आसिफ शेखको स्थानमा अर्जुन साउदलाई खेलाउने देखिन्छ ।

पहिलो खेलमा सोमपाल कामीले ७५ रन बनाउँदै नेपालको साख जोगाएका थिए । दोस्रो खेलमा रोहित पौडेलले अर्धशतकीय इनिङ खेलेका थिए । नेपालको पावर प्ले नै सम्झन लायक छैन । त्यसैले शीर्षक्रमका ब्याटरले जिम्मेवारी प्रदर्शन गर्नुपर्ने हुन्छ ।

ओपनर आसिफ शेख, कुशल भुर्तेल र रोहित मध्य एक ब्याटरले ठूलो इनिङ खेल्नुपर्ने हुन्छ । नेपाली ब्याटरले स्पिनरविरुद्ध राम्रो प्रदर्शन गरेका छन् । तर तीव्र गतिका बलरविरुद्ध प्रदर्शन राम्रो छैन । त्यसैले पावर प्लेमा नेपालले कम्तिमा विकेट नगुमाई रन जोड्नुपर्ने देखिन्छ ।