काठमाडौं (हाम्रो खेलकुद) – नेपालका ओपनर ब्याटर कुशल भुर्तेलले एसिसी इमर्जिङ कपमा युएई ए विरुद्ध अविश्वसनीय अलराउन्ड प्रदर्शनका साथ दुर्लभ कीर्तिमान बनाएका छन् । कुशल नेपाली क्रिकेट टोलीबाट एकै खेलमा ५ भन्दामाथि बढी विकेट र ५० रन बनाउने पहिलो खेलाडी बनेका छन् ।

कुशलले युएई ए विरुद्ध ७१ रन बनाउनुको साथै ६ विकेट लिएका थिए । यसअघि नेपालबाट उमेर समूहमा मन्जित श्रेष्ठ र निश्चिल पाण्डेले यस सफलता हात पारेका थिए । तर सिनियर कुनैपनि प्रतियोगितामा यस सफलता हात पारेका छैनन् ।

उमेर समूहमा मन्जित श्रेष्ठले २००१ को यू-१९ कपमा माल्दिभ्स र २०१० मा यू-१६ इलिट कपमा निश्चिल पाण्डेले कुवेतविरुद्ध एकै खेलमा अर्धशतक र पाँचमाथि विकेट लिएका थिए ।

लिष्ट ए मा ५ माथि विकेट लिने उनी नेपालको पाँचौं बलर हुन् । यसअघि सोमपाल कामी, सन्दीप लामिछाने, करण केसी र ललितनारायण राजवंशीले ओडिआईमा पाँच विकेट लिएका थिए । ओडिआईको प्रदर्शन लिष्ट ए पनि मानिन्छ ।

टस जितेर पहिला ब्याटिङ रोजेको युएईको युवा टोलीलाई ४४ ओभरमा १ सय ५७ रनमा अल आउट गर्न कुशलले ६ विकेट लिए । लेग स्पिनर कुशल भुर्तेलले १० ओभरमा ४० रन खर्चेर ६ विकेट लिएका थिए । कुशल भुर्तेलले ४३ बलमा ९ चौका र ४ छक्कासहित ७१ रनको आक्रामक इनिङ खेलेका थिए ।

कुशल भुर्तेलको यो कुनैपनि राष्ट्रिय वा अन्तर्राष्ट्रिय क्रिकेट करिअरको उत्कृष्ट बलिङ प्रदर्शन हो । कुशलले यसअघि गतवर्ष प्रधानमन्त्री कपमा नेपाल पुलिस क्लबबाट मधेश प्रदेशविरुद्ध ८.३ ओभरमा २ मेडनसहित २२ रन खर्चेर ५ विकेट लिएका थिए । त्यो नै कुशलको करिअरको पाँच विकेट थियो । कुशल नेपालका पार्टटाइम स्पिनर हुन् ।

लेग स्पिनर सन्दीप लामिछाने हुँदा टोलीमा बलिङ गर्ने अवसर विरलै पाउँछन् । तर सन्दीप यो पटक ग्लोबल टि२० क्यानडाको कारण छैनन् । युएई ए विरुद्ध नेपालले श्याम ढकाललाई लेग स्पिनरको रुपमा खेलाएको थियो ।

तर श्याम ढकाल (मौसम) अघि कप्तान रोहित पौडेलले कुशल भुर्तेललाई बलिङ दिने निर्णय लिएका थिए । त्यो निर्णयलाई कुशलले अविश्वसनीय रुपमा बलिङ गरेका थिए ।