एजेन्सी – नेपाल एसिया कप खेल्ने आठौं टोली बन्ने भएको छ । एकदिवसीय एसिया कप २०२३ आगमी अगष्ट र सेप्टेम्बरमा पाकिस्तान र श्रीलंकामा हुँदैछ । नेपालले गत वैशाखमा एसिसी प्रिमियर कपको उपाधि जित्दै एसिया कपमा स्थान बनाएको थियो ।

एसिया कपमा डेब्यू गर्ने नेपाल आठौं टोली बन्ने भएको छ । भारत, श्रीलंका, पाकिस्तान, बंगलादेश, अफगानिस्तान, हङकङ र युएईपछि एसिया कप खेल्ने नेपाल आठौं टोली बन्नेछ । एसोसिएट टोलीमा नेपाल हङकङ र युएईपछि तेस्रो टोली बन्नेछ ।

एसियन क्रिकेट काउन्सिल एसिसीले आफ्ना टोलीलाई विश्वकप अघि तयारीको लागि एसिया कप आयोजना गर्दछ । एसिया कप एकदिवसीय वा टि२० भने विश्वकपमा भरपर्ने गर्दछ । यस पटक आगमी अक्टोबर नोभेम्बरमा भारतमा एकदिवसीय विश्वकप हुँदैछ ।

त्यसैले एसिया कप पनि एकदिवसीय हुन लागेको हो । विश्वका पावर हाउससँग एक एसोसिएट टोलीलाई समेत खेल्ने अवसर दिन्छ । युएईले २००४, २००८ र २०१६ मा एसिया कप खेलेको थियो । हङकङले २००४, २००८, २०१८ र २०२२ मा एसिया कप खेलेको थियो ।

एसिया कपको उपाधि हालसम्म भारत, पाकिस्तान र श्रीलंकाले जितेका छन् । भारतले १९८४, १९८८, १९९०÷९१, १९९५, २०१०, २०१६ र २०१८ गरि ७ पटक एसिया कपको उपाधि जितेको छ ।

श्रीलंकाले १९८६, १९९७, २००४, २००८, २०१४ र २०२२ को संस्करण गरि ६ पटक उपाधि जितेकोछ । पाकिस्तानले २००० र २०१२ मा उपाधि जितेको थियो । बंगलादेश २०१२, २०१६ र २०१८ को फाइनलमा पुगेर हार्न पुगेको थियो । अफगानिस्तानले सुपर फोरसम्म मात्रै स्थान बनाउन सकेको छ ।

नेपाल र पाकिस्तानबीचको खेल भदौं १३ (अगष्ट ३०) मा मुल्तानमा हुनेछ । पाकिस्तानको मुल्तानमा उक्त खेलपछि नेपाल श्रीलंका जानुपर्ने हुन्छ । नेपाल र भारतबीचको खेल भने श्रीलंकाको काड्नीमा भदौं १८ (सेप्टेम्बर ४ ) मा हुनेछ ।

समूह ए मा नेपाल, भारत र पाकिस्तान छन् । समूह बी मा बंगलादेश, श्रीलंका र अफगानिस्तान छन् । हरेक समूहको शीर्ष दुई टोली सुपर फोरमा पुग्नेछन् । सुपर फोरमा ६ सेप्टेम्बर देखी १५ सम्म हुनेछन् । सुपर फोरको एक खेल मात्रै पाकिस्तानमा हुनेछ । अन्य सबै श्रीलंकामा हुनेछन् ।