एजेन्सी – बर्षाले साथ दिएपछि अष्ट्रेलियाले विश्व चर्चित द एसेज ट्रफी एक खेल अगावै रक्षा गरेको छ । इंग्ल्यान्डसँगको चौथो टेस्ट खेल वर्षाको कारण पाँचौ दिन हुन नसकेपछि खेल बराबरीमा सकिँदा पाँच खेलको सिरिजमा अष्ट्रेलियाले २-१ को अग्रता लिँदै एसेज ट्रफी रक्षा गरेको छ ।

सहज हारको मुखमा पुगेको अष्ट्रेलियालाई वर्षाले साथ दिएपछि खेल बराबरीमा सकिन पुग्यो । तेस्रो दिनको खेल सकिदा अष्ट्रेलिया दोस्रो इनिङमा ११३-४ को अवस्थामा थियो । पहिलो इनिङमै अष्ट्रेलिया २ सय ७५ रनले पछि परेको थियो ।

तर चौथो दिन वर्षाको कारण अन्तिम सेसन मात्रै हुन सक्यो । पाँचौं दिन एकपनि बल हुन सकेन । त्यसैको कारण खेल बराबरीमा सकियो । यस खेल अघिनै अष्ट्रेलिया २-१ ले अघि थियो । त्यसैले अष्ट्रेलियाको जितमा बर्षा नायक बनेको हो ।

इंग्ल्यान्डलाई भने वर्षा भिलेन बन्न पुगेको छ । अष्ट्रेलियाको लागि दोस्रो इनिङमा मार्नस लाबुसेनले १ सय ७३ बलमा १० चौका र २ छक्कासहित १ सय ११ रनको शतकीय इनिङ खेलेका थिए ।

ओपनर उस्मान खवाजा १८, डेविड वार्नर २८ र स्टिभ स्मिथ १७ रनमा आउट भए । इंग्ल्यान्डका मार्क वुडले सर्वाधिक तीन विकेट लिए ।

तेस्रो दिन इंग्ल्यान्ड पहिलो इनिङमा ५ सय ९२ रनमा अल आउट भएको थियो । इंग्ल्यान्डका ओपनर ज्याक क्रली १ सय ८२ बलमा २१ चौका र ३ छक्कासहित १ सय ८९ रनमा बोल्ड आउट भए । टेस्ट करिअरको यो उनको चौथो शतक थियो । तर वर्षाले गर्दा जित पर्याप्त हुन सकेन ।

त्यस्तै जो रुट ९५ बलमा ८ चौका र १ छक्कासहित ८४, बेन डकेट १ र मोईन अली ५४ रनमा आउट भए । तेस्रो दिन जोनी बेयरस्टो ८१ बलमा १० चौका र ४ छक्कासहित ९९ रनमा नट आउट रहे । ह्यारी ब्रुक ६१ र बेन स्टोक्स ५१ रनमा आउट हुन पुगे । मिचेल स्टार्क र क्यामरन ग्रीनले समान दुई विकेट लिए ।

त्यसअघि म्यानचेस्टरमा टस हारेर पहिला ब्याटिङको निम्तो पाएको अष्ट्रेलिया पहिलो इनिङमा ३ सय १७ रनमा अल आउट भएको थियो । अष्ट्रेलियाका मार्नस लाबुसेन र मिचेल मार्शले समान ५१ रन बनाए ।

ओपनर डेविड वार्नरर ३२, उस्मान खवाजा ३, स्टिभ स्मिथ ४१, ट्रविस हेड ४८, क्यामरन ग्रीन १६ र एलेक्स केरी २० रनमा आउट भए । मिचेल स्टार्क ९३ बलमा ६ चौकासहित ३६ रनमा अविजित रहे ।

इंग्ल्यान्डका क्रिस वोक्सले सर्वाधिक ५ विकेट लिए । स्टुअर्ट ब्रोडले दुई, जिमी एन्डरसन, मार्क वुड र मोईन अलीले समान एक विकेट लिए । पाँच टेस्ट खेलको सिरिजमा अष्ट्रेलिया २–१ ले अघि छ ।

अष्ट्रेलिया पहिलो र दोस्रो खेलमा २ विकेट र ४३ रनले विजयी भएको थियो । तेस्रो खेलमा इंग्ल्यान्ड ३ विकेटले विजयी भएको थियो । पाँचौं तथा अन्तिम खेल २७ जुलाई देखी द ओभलमा सुरुहुनेछ ।