काठमाडौं (हाम्रो खेलकुद) – नेपाली क्रिकेट टोलीका अलराउन्डर दीपेन्द्रसिंह ऐरी सम्मिलित मोन्टरिएल टाइगर्सले ग्लोबल टि२० क्यानडामा मिसिसौगा प्यान्थर्सलाई ७ विकेटले हराएको छ । टाइगर्सको यो लगातार दोस्रो जित हो ।

जितको लागि १ सय ४१ रनको विजयी लक्ष्य पछ्याएको टाइगर्स १५.५ ओभरमा ३ विकेट गुमाउँदै विजयी भयो । कप्तान क्रिस लिनले ४५ बलमा ९ चौका र १ छक्कासहित ६४, सकिब अल हसन २४ बलमा ५ चौका र २ छक्कासहित ३६ र शेर्फान रदरफोर्ड २७ रनमा आउट भए ।

त्यसअघि टस हारेर पहिला ब्याटिङको निम्तो पाएको प्यान्थर्सले निर्धारित २० ओभरमा ६ विकेट गुमाउँदै १ सय ४० रन बनायो । उसका लागि जेम्स निशमले ३५ बलमा ४ चौका र २ छक्कासहित सर्वाधिक ५४ रन बनाए । तर दीपेन्द्रलाई भने यस खेलमा बेन्चमा राखेको थियो ।

दीपेन्द्रले पहिलो खेलमा सर्रे जागुअर्सविरुद्ध २२ बलमा २ चौकासहित सर्वाधिक २८ रन बनाएका थिए । टोलीका लागि सर्वाधिक रन बनाएका दीपेन्द्रलाई टाइगर्सले बेन्चमा राख्ने निर्णय लिएको थियो । दीपेन्द्रलाई बेन्चमा राख्दा म्याथ्यु स्पोर्सलाई मौका दिएको थियो ।

उता सन्दीप लाममिछाने सम्मिलित सर्रे र ब्राम्पटन वल्भ्सबीचको खेल बर्षाको कारण हुन सकेन । सर्रे जागुएर्सले टस जितेर पहिला बलिङ गर्ने निर्णय लिएको थियो । तर ब्राम्पटन ७.२ ओभरमा ५०-३ को अवस्थामा वर्षाको कारण खेल रोकिएको थियो ।

सन्दीप लामिछाने आफ्नो पहिलो ओभर लिएर आएका थिए । सुरुवाती दुई बलमा तीन रन खर्चेका थिए । तर वर्षाले आफ्नो पुरै ओभर भने गर्न पाएनन् । सन्दीप सम्मिलित सर्रेले अव भोली साँझ त्रिनाडो नेशनलसँग खेल्नेछ । दीपेन्द्र सम्मिलित टाइगर्सले भोली राती १ : १५ मा भ्यानकुभर नाइट्ससँग खेल्नेछ ।