एजेन्सी – एसिसी इमर्जिङ एसिया कपमा नेपालविरुद्ध घातक बलिङ गरेका भारतीय स्पिनर निशान्त सिन्धु प्रतियोगिताका सर्वोत्कृष्ट खेलाडी चुनिएका छन् ।

भारत ए फाइनलमा पाकिस्तान ए सँग १ सय २८ रनले पराजित भएपनि उनी सर्वोत्कृष्ट खेलाडी चुनिएका हुन् । उनले प्रतियोगितामा ११ विकेट लिएका थिए ।

समूह चरणमा नेपाललाई १ सय ६७ रनमा अल आउट गर्न निशान्त सिन्धुले ३.२ ओभरमा १४ रन खर्चेर ४ विकेट लिएका थिए । उनले रोहित पौडेल, गुलशन झा, पवन सरार्फ र ललितनारायण राजवंशीलाई आउट गरेका थिए ।

सेमिफाइनल खेलमा बंगलादेशविरुद्ध सानदार पूनरागमन जित दिलाउन सिन्धुले ८ ओभरमा २० रन खर्चेर ५ विकेट लिएका थिए । पाकिस्तानसँग फाइनल र समूह चरणमा समान एक विकेट लिएका थिए । युएईविरुद्ध विकेट विहीन बनेका थिए ।

जितको लागि ३ सय ५३ रनको विशाल विजयी लक्ष्य पछ्याएको भारत ४० ओभरमा २ सय २४ रनमा अल आउट भएको थियो । भारतका ओपनर अभिषेक शर्माले ५१ बलमा ५ चौका र १ छक्कासहित सर्वाधिक ६१ रनको योगदान दिएका थिए ।

त्यसअघि कोलोम्बोमा टस हारेर पहिला ब्याटिङको निम्तो पाएको पाकिस्तानले निर्धारित ५० ओभरमा ८ विकेट गुमाउँदै ३ सय ५२ रन बनाएको थियो । पाकिस्तानलाई च्याम्पियन बनाउन तयाब ताहिरले ७१ बलमा १२ चौका र ४ छक्कासहित १ सय ८ रनको सानदार शतकीय इनिङ खेलेका थिए ।

पाकिस्तानले लगातार दोस्रो पटक उपाधि जितेको हो । यसअघि २०१९ को फाइनलमा बंगलादेशलाई ७७ रनले हराउँदै उपाधि जितेको थियो । भारत भने २०१३ पछि उपाधि विहीन छ ।

भारतले पहिलो संस्करणको फाइनलमा पाकिस्तानलाई ९ विकेटले हराउँदै उपाधि जितेको थियो । २०१८ को फाइनलमा भारत श्रीलंकासँग ३ रनले पराजित भएको थियो । २०१७ र २०१९ को संस्करणमा भने फाइनलमा पुग्न सकेको थिएन ।