काठमाडौं (हाम्रो खेलकुद) – नेपाल टि२० लिगमा स्पट फिक्सिङको आरोप लागेका आदिल अन्सारी झण्डै एक वर्षदेखि राष्ट्रिय क्रिकेट टोलीमा छैनन् । गत पुषमा सम्पन्न नेपाल टि२० लिगमा जनकपुर रोयल्सबाट खेल्नेक्रममा स्पट फिक्सिङको आरोपमा उनी माघ पहिलो साता प्रकाउ परेका थिए ।

आदिलले खेलको क्रममा स्पट फिक्सिङ गरेको भन्दै गत माघ ९ मा नेपाल प्रहरीको केन्द्रिय अनुसन्धान ब्यूरो (सिआईबी) ले प्रकाउ गरेको थियो । फागुन १० गते उनलाई काठमाडौं जिल्ला अदालतले तीन लाख धरौटीमा छाड्न आदेश दिएको थियो ।

अदालतले धरौटीमा छोडेयता आदिलले अधिकारिक घरेलु क्रिकेट खेलेका छैनन् र राष्ट्रिय टोलीबाट पनि बाहिर रहँदै आएका छन् । तीव्र गतिसँगै तल्लोक्रममा विष्फोटक ब्याटिङको क्षमता बोकेका आदिल नेपालका एक म्याच विनर खेलाडी हुन् ।

नेपाल क्रिकेट संघ (क्यान) ले अन्तर्राष्ट्रिय क्रिकेट परिषद् (आइसिसी) ले क्लिन चिट नदिएसम्म टोलीमा राख्न नसकिने बताएको छ । ‘आदिलको मुद्दा अहिले अदालतमा विचाराधीन छ । फिक्सिङ र डोपिङको कुरामा हामीले अन्तर्राष्ट्रिय संस्थाले हेरिरहँदा यसैपनि केही बोल्न मिल्दैन । आइसीसीले पनि यसबारे हेरिरहेको छ । जबसम्म क्लिनचिट पाउँदैन तबसम्म यसबारे बोल्न गाह्रो छ’, क्यानका कार्यवाहक सचिव दुर्गाराज पाठकले हाम्रो खेलकुदसँग भने ।

पाठकका अनुसार आइसीसीले उनलाई टोलीमा नराख भनेर निर्देशन नै भने नदिएको बताउँछन् । ‘आइसिसीले नराख भनेर नराखेको होईन । तर आइसिसीको गाइडलाइन अनुसार नै त्यो मिल्दैन । उमाथि अझै पनि अरोप कायम छ । अदालतबाट हो वा होइन भन्ने प्रमाणित भएको छैन’, उनले भने ।

गत भदौमा नेपाली क्रिकेट टोलीका स्पिनर सन्दीप लामिछानेमाथि एक १७ वर्षीय नाबालिका बलात्कार गरेको गम्भीर आरोप लागेको थियो । सन्दीप भने राष्ट्रिय टोलीको महत्त्वपूर्ण सदस्य रहेको भन्दै सर्वोच्च अदालतमा मुद्दा चलिरहँदा फागुनमा नेपाली क्रिकेट टोलीबाट खेलेका थिए ।

क्यानले नै सन्दीपलाई टोलीको बन्द प्रशिक्षण हुँदै अन्तिम टोलीमा समावेश गरेको थियो । सन्दीपको उत्कृष्ट प्रदर्शनको सहयोगमा नेपालले ओडिआई मान्यता जोगाउँदै विश्वकप छनोटसम्म पुग्न सफल भएको थियो ।

सन्दीपविरुद्धको मुद्दा अहिले पनि अदालतमा यथावत छ । सन्दीप दोषी हुन् वा होइनन् हालसम्म प्रमाणित भएको छैन । सन्दीपले यसबीचमा राष्ट्रिय टोली मात्रै होइन ग्लोबल टि२० क्यानडा लिग पनि खेलिरहेका छन् । सुरुवातमा राष्ट्रिय टोलीबाट खेल्न नै अदालतले स्वीकृति दिन आनकानी गरेको अवस्थाबाट अहिले उनलाई व्यावसायिक लिगमा पनि सहभागिता जनाउन दिइएको छ ।

त्यसैगरि आदिल पनि दोषी हुन् वा होइनन् भन्ने प्रष्ट भएको छैन । सन्दीपलाई टोलीमा बोलाउन मिल्छ भने आदिललाई किन मिल्दैन भन्ने प्रश्नमा पाठक यी दुई मुद्दाको प्रकृति नै फरक भएको बताउँछन् ।

‘सन्दीप र आदिलको मुद्दा नै फरक हो । सन्दीपलाई बलात्कारको आरोप लागेको भयो । अन्तर्राष्ट्रिय जगतमा सेलेब्रेटीमाथि बलात्कारको मिथ्या आरोप पनि लाग्नसक्छ । सेलिब्रेटीमाथि बलात्कारको आरोप लाग्न सक्ने भन्दै आइसिसीले यसलाई कम गम्भीरतापूर्ण लिएको हुन्छ । तर डोपिङ र फिक्सिङमा आइसिसीको आचारसहिंताले कहि पनि अघि जान दिंदैन । आइसिसीको गाइडलाइनमा जबसम्म क्लिनचिट पाउँदैन तबसम्म खेल्न पाउँदैन भन्ने छ’, उनले भने ।

सन्दीपलाई क्यानले त्यसबेला अनुशासन उल्लङ्घनको कारण देखाउँदै कप्तानबाट हटाउनुको साथै टोलीबाट निलम्बन गरेको थियो । तर आदिललाई क्यानले हालसम्म अधिकारिक रुपमा कुनै कारवाही पनि गरेको छैन । फिक्सिङको कुरामा आइसिसीसँग जोडबल गर्न नमिल्ने क्यानको भनाइ छ ।

आदिलले नेपालबाट ६ ओडिआई ८ टि२० आई खेलेका छन् । आदिलले गतवर्ष जुनमा आदिलले अमेरिकाविरुद्ध डेब्यू गरेका थिए । जितको लागि २ सय ७५ रनको विजयी लक्ष्य पछ्याएको अमेरिकालाई अन्तिम ६ बलमा ६ रन जित्नको लागि आवश्यक थियो ।

आदिलले एक रन आउटसहित दुई विकेट लिँदै मात्र ५ रन खर्चेपछि खेल रोमान्चक बराबरीमा सकिएको थियो । उक्त डेब्यू खेलमा आदिलले २४ बलमा ३ चौका र २ छक्कासहित ३६ रनको आक्रामक इनिङ खेलेका थिए ।

टि२० आईमा भने २०२२ मार्चमा आदिलले पपुवा न्युगिनीविरुद्ध टियु मैदानमा डेब्यु गरेका थिए । उनले पछिल्लो पटक नेपाली क्रिकेट टोलीबाट २०२२ अगष्टमा केन्याविरुद्ध अन्तिम टि२० आई खेलेका थिए ।