एजेन्सी – घरेलु टोली पपुवा न्युगिनीले आइसिसी टि२० विश्वकप इस्ट एसिया प्यासिफिक छनोटमा एक खेल अगावै उपाधि जित्दै विश्वकपमा स्थान पक्का गरेको छ । पपुवा न्युगिनीले शुक्रबार फिलिपिन्सलाई १ सय रनको फराकिलो अन्तरले हराउँदै २०२४ मा अमेरिका र वेस्टइन्डिजमा हुने टि२० विश्वकपमा स्थान पक्का गरेको हो ।

अमिनी पार्कमा टस हारेर पहिला ब्याटिङको निम्तो पाएको पपुवा न्युगिनीले निर्धारित २० ओभरमा ६ विकेट गुमाउँदै २ सय २९ रन बनाएको थियो । ओपनर टोनी उराले ३१ बलमा ३ चौका र ५ छक्कासहित सर्वाधिक ६१ रनको इनिङ खेल्दै प्लेयर अफ द म्याच चुनिए ।

असाद भाला ३९ बलमा ५ चौका र २ छक्कासहित ५९, लेगा सियाका २६ र हिरि हिरि २० रन बनाए । चाल्स अमिनीले २७ बलमा ३ चौका र ४ छक्कासहित ५३ रनमा आउट भए ।

जितका लागि २ सय ३० रनको विशाल विजयी लक्ष्य पछ्याएको फिलिपिन्सले निर्धारित २० ओभरमा ७ विकेट गुमाउँदै १ सय २९ रन बनायो । फिलिपिन्सका कप्तान ड्यानियल स्मिथले सर्वाधिक ३४ रन बनाए । पपुवा न्युगिनीका काबुआ मोरेआले सर्वाधिक दुई विकेट लिए ।

पपुवा न्युगिनी ५ खेलमा १० अंकका साथ शीर्ष स्थानमा रहँदै विश्वकपमा पुगेको हो । अन्तिम खेल पपुवा न्युगिनीले शनिबार जापानसँग खेल्नेछ । जापान ५ खेलमा ६ अंकका साथ दोस्रो स्थानमा छ ।

प्रतियोगितामा पपुवा न्युगिनी, जापान, भानुआतु र पिलिफिन्स छन् । यी चार टोलीले डबल राउन्ड रोबिनको आधारमा प्रतिस्पर्धा गरेका थिए । पपुवा न्युगिनी शीर्ष स्थानमा रहँदै विश्वकप खेलेको हो । पपुवा न्युगिनी दोस्रो पटक टि२० विश्वकपमा पुगेको हो । यसअघि पपुवा न्युगिनीले २०२१ मा पनि टि२० विश्वकप खेलेको थियो ।

युरोप क्षेत्र छनोटबाट आयरल्यान्ड र स्कटल्यान्डले विश्वकपमा स्थान बनाई सकेका छन् । नेपालले भने आगमी नोभेम्बरमा एसिया क्षेत्र छनोट आयोजना गर्नेछ ।