एजेन्सी – आगमी वर्ष अमेरिका र वेस्टइन्डिजमा संयुक्त रुपमा आयोजना हुने टि२० विश्वकप खेल्ने २० मध्य अव पाँच टोलीको मात्रै टुङ्गो लाग्न बाँकी रहेको छ । आइसिसीले पहिलो पटक टि२० विश्वकप १६ संख्याबाट बढाएर २० टोली गराउँदैछ । जसमा १२ टोलीले सोझै र तीन टोलीले छनोट खेल्दै विश्वकपमा स्थान बनाएका छन् ।

अमेरिका, वेस्टइन्डिज, अष्ट्रेलिया, इंग्ल्यान्ड, भारत, नेदरल्यान्ड्स, न्युजिल्यान्ड, पाकिस्तान, दक्षिण अफ्रिका, श्रीलंका, अफगानिस्तान, बंगलादेश, स्कटल्यान्ड, आयरल्यान्ड र पपुवा न्युगिनीले विश्वकपमा स्थान बनाएका छन् ।

स्कटल्यान्ड, आयरल्यान्ड र पपुवा न्युगिनीले छनोट र अन्य टोलीले सोझै स्थान बनाएका हुन् । अव तीन क्षेत्रिय छनोट हुन बाँकी छ । जसबाट पाँच टोली आउने छन् । विश्वकप एसिया क्षेत्र छनोटबाट दुई टोली विश्वकपमा पुग्नेछन् ।

अक्टोबर ३० देखी ९ नोभेम्बरसम्म हुने एसिया क्षेत्र छनोटबाट आयोजक नेपाल, हङकङ, युएई, ओमान, सिंगापुर, बहराइन र क्वालिफायर ए र बी बाट आउने दुई टोली हुनेछन् ।

एसिया छनोट ए मा कुवेत, माल्दिभ्स, कतार र साउदी अरेविया छन् । एसिया छनोट बी मा भुटान, चीन, मलेसिया, म्यानमार र थाईल्यान्डछन् ।

अमेरिका छनोटबाट एक टोली विश्वकपमा पुग्नेछन् । सेप्टेम्बर २८ देखी ८ अक्टोबर सम्म हुने अमेरिका छनोटमा आयोजक बर्मुडा, क्यानडा, पानमा र केम्यान आइसल्यान्ड्स छन् । डबल राउन्ड रोबिनको आधारमा हुने उक्त प्रतियोगिताबाट शीर्ष टोली विश्वकपमा पुग्नेछ ।

त्यस्तै अफ्रिका छनोटबाट शीर्ष दुई टोली आउनेछन् । नामिबियामा २० नोभेम्बर देखी १ डिसेम्बर सम्म हुने अफ्रिका छनोटमा नामिबिया, केन्या, नाइजेरिया, रवान्डा, तान्जेनिया, युगान्डा र जिम्बावे छन् । हालसम्म २०२४ को विश्वकपमा नपुग्ने जिम्बावे एक्लो टेस्ट टोली हो ।