एजेन्सी – भारतीय युवा ब्याटर रियान परागले देवधर ट्रफीमा इस्ट जोनबाट नर्थ जोनविरुद्ध छक्काको वर्षा गराउँदै सानदार शतक प्रहार गरेका छन् ।

उनको सानदार अलराउन्ड प्रदर्शनमा इस्ट जोन ८८ रनले विजयी भएको थियो । टस जितेर पहिला ब्याटिङ रोजेको इस्ट जोनले निर्धारित ५० ओभरमा ८ विकेट गुमाउँदै ३ सय ३७ रन बनायो ।

इस्ट जोनका लागि रियान परागले १ सय २ बलमा ५ चौका र ११ छक्कासहित १ सय ३१ रनको सानदार शतकीय इनिङ खेले ।

विकेटकिपर कुमार कुशाग्रा ८७ बलमा ८ चौका र ४ छक्कासहित ९८ रनमा आउट भए । एक समय ५७–५ को दयनीय अवस्थामा पुगेको टोलीलाई विशाल योगफलमा पुर्याउन रियान परागले कुमार कुशाग्रासँग छैटौं विकेटका लागि १ सय ८२ बलमा २ सय ३५ रनको सानदार दोहोरो शतकीय साझेदारी गरेका थिए ।

नर्थ जोनका मयंक यादवले १० ओभरमा ६३ रन खर्चेर सर्वाधिक ४ विकेट लिए । हर्षित रानाले ९ ओभरमा ५४ रन खर्चेर ३ विकेट लिए ।

जितको लागि ३ सय ३८ रनको विशाल विजयी लक्ष्य पछ्याएको नर्थ जोन ४५.३ ओभरमा २ सय ४९ रनमा अल आउट भयो । उसको लागि ओपनर अभिषेक शर्माले ४४, कप्तान नितिश राणाले २७ र मन्दीप सिंहले ५० रन बनाए ।

इस्ट जोनका रियान परागले १० ओभरमा १ मेडनसहित ५७ रन खर्चेर ४ विकेट लिए । अहमद शहबाजले ९.३ ओभरमा ४१ रन खर्चेर ३ विकेट लिए ।