एजेन्सी – नेपाली क्रिकेट टोलीका स्पिनर सन्दीप लामिछानेले उत्कृष्ट बलिङ गरेपछि सर्रे जागुअर्सले ग्लोबल टि२० क्यानडामा मिसिसौगा प्यान्थर्समाथि ५५ रनको सानदार जित हात पारेको छ । दोस्रो जितका साथ सर्रे ५ अंक बनाउँदै तेस्रो स्थानमा उक्लिएको छ ।

जितको लागि १ सय ६५ रनको विजयी लक्ष्य पछ्याएको प्यान्थर्स १७ ओभरमा मात्रै १ सय ९ रनमा अल आउट भयो । उसका लागि क्यामरन दीलपोर्टले २१ बलमा ४ छक्कासहित सर्वाधिक ३३ रन बनाए ।

उनी सन्दीपको बलमा प्रगत सिंहबाट क्याच आउट हुन पुगे । त्यस्तै श्रेयस मोवा ३१ बलमा ५ चौकासहित ३१, क्रिस गेल ३, आयन खान १४ र जेम्श निसम शून्यमा आउट भए । न्युजिल्यान्डका स्टार अलराउन्डर जेम्श निसम सन्दीपको बलमा विकेटकिपर लिटन दासबाट स्टमपिङ आउट भएका थिए ।

सन्दीपले जसकरण सिंहलाई एक रनमा एलेक्स हेल्सबाट क्याच आउट गराए । सन्दीपले ३ ओभरमा १८ रन खर्चेर ३ विकेट लिए । स्पेन्सर जोनसनले ४ ओभरमा २५ रन खर्चेर ३ विकेट लिए । त्यस्तै म्याथ्यु फोर्डले २, आयन खान र अमर खलिदले समान एक विकेट लिए ।

त्यसअघि टस हारेर पहिला ब्याटिङको निम्तो पाएको जतिन्दर सिंहले ४५ बलमा ५ चौका र १ छक्कासहित सर्वाधिक ५७ रन बनाउँदै प्लेयर अफ द म्याच चुनिए ।

एलेक्स हेल्सले २१ बलमा ९ चौकासहित ३९ रनमा आउट भए । लिटन दासले ३० बलमा १ चौका र १ छक्कासहित २५ रन बनाए । प्यान्थर्सका जहुर खानले ४ ओभरमा ३६ रन खर्चेर सर्वाधिक ३ विकेट लिए ।

उता दीपेन्द्रसिंह ऐरी सम्मिलित मोन्टरिएल टाइगर्सले टोरान्टो नेशनलसँग शनिबार साँझ प्रतिस्पर्धा गर्नेछ । सन्दीपको टोलीले आज राती भ्यानकुभर नाइट्ससँग खेल्नेछ । सन्दीपले ४ खेलमा ७ विकेट लिई सकेका छन् । दीपेन्द्रले तीन खेलमा ७८ रन बनाउनुको साथै १ विकेट लिएका छन् ।