एजेन्सी – प्रमुख ब्याटर स्टिभ स्मिथको अर्धशतकमा अष्ट्रेलियाले द एसेजको अन्तिम तथा पाँचौं टेस्ट खेलमा पहिलो इनिङमा सामान्य अग्रता लिएको छ । अष्ट्रेलिया पहिलो इनिङमा २ सय ९५ रनमा अल आउट भयो । पहिलो इनिङमा अष्ट्रेलियाले १२ रनको सामान्य अग्रता लिएको हो ।

अष्ट्रेलियाका स्टिभ स्मिथले १ सय २३ बलमा ६ चौकासहित सर्वाधिक ७१ रनको योगदान दिए । अन्य ब्याटरले भने ठूलो इनिङ खेल्न सकेनन् । ओपनर उस्मान खवाजा ४७, डेविड वार्नर २४, मार्नस लाबुसेन ९, एलेक्स केरी १० र मिचेल मार्श १६ रनमा आउट भए ।

इंग्ल्यान्डका क्रिस वोक्सले सर्वाधिक तीन विकेट लिए । स्टुअर्ट ब्रोड, मार्क वुड र जो रुटले समान दुई विकेट लिए ।

त्यसअघि द ओभलमा टस हारेर पहिला ब्याटिङको निम्तो पाएको इंग्ल्यान्ड मात्रै ५४.४ ओभरमा २ सय ८३ रनमा अल आउट भएको थियो । इंग्ल्यान्डका युवा ब्याटर ह्यारी ब्रुकले ९१ बलमा ११ चौका र २ छक्कासहित सर्वाधिक ८५ रनको इनिङ खेलेका थिए ।

ओपनर ज्याक क्रली २२, बेन डकेट ४१, मोईन अली ३४, जो रुट ५, बेन स्टोक्स ३, जोनी बेयरस्टो ४, मार्क वुड २८ र क्रिस वोक्सले ३६ रनको योगदान दिए ।अष्ट्रेलियाका मिचेल स्टार्कले सर्वाधिक ४ विकेट लिए ।

जोश हेजलवुड र टोड मर्फीले समान दुई विकेट लिए । पाँच खेलको सिरिजमा अष्ट्रेलिया २–१ ले अघि हुँदै एशेज ट्रफी रक्षा गर्न सफल भई सकेको छ ।