एजेन्सी – घरेलु टोली वेस्टइन्डिजले दोस्रो ओडिआई खेलमा भारतमाथि ६ विकेटको सानदार जित हात पारेको छ । योसँगै तीन खेलको ओडिआई सिरिज १-१ को बराबरी अवस्थामा पुगेको छ ।

जितको लागि १ सय ८२ रनको विजयी लक्ष्य पछ्याएको वेस्टइन्डिज ३६.४ ओभरमा ४ विकेट गुमाउँदै पूरा गर्यो । वेस्टइन्डिजको जितमा कप्तान शाई होप ८० बलमा २ चौका र २ छक्कासहित सर्वाधिक ६३ रनमा अविजित रहे । केसी कार्टी ६५ बलमा ४ चौकासहित ४८ रनमा नट आउट रहे ।

वेस्टइन्डिजलाई ओपनर ब्रेन्डन किंग र कायल मेयर्सले ८.२ ओभरमा ५३ रनको साझेदारी गर्दै राम्रो सुरुवात दिलाएका थिए । मेयर्स २८ बलमा ४ चौका र २ छक्कासहित ३६, किंग १५, एलिक आथानाज ६ र शिम्रन हेटमायर ९ रनमा आउट भए । भारतका शार्दुल ठाकुरले ८ ओभरमा ४२ रन खर्चेर ३ विकेट लिए ।

त्यसअघि बार्बाडोसमा टस हारेर पहिला ब्याटिङको निम्तो पाएको भारत ४०.५ ओभरमा १ सय ८१ रनमा अल आउट भयो । प्रमुख दुई ब्याटर विराट कोहली र रोहित शर्मालाई विश्राम दिने भारतको निर्णय भारी पर्यो ।

भारतका ओपनर ईशान किशन ५५ बलमा ६ चौका र १ छक्कासहित सर्वाधिक ५५ रनमा आउट भए । शुभमन गिल ४९ बलमा ५ चौकासहित ३४ रनमा आउट भए । भारतलाई लिग र किशनले १६.५ ओभरमा ९० रनको साझेदारी गर्दै उत्कृष्ट सुरुवात दिलाएका थिए ।

गिल स्पिनर गुडाकेश मोतीको बलमा ठूलो सट खेल्ने धुनमा लङअफमा अल्जारी जोशेफबाट क्याच आउट भए । त्यसपछि भने लगातार विकेट गुमाउन पुगेको थियो ।

लगत्तै अर्को बलमा ईशान किशन रोमारियो शेफर्डको बलमा प्वाइन्टमा क्याच आउट भए । शेफर्डको बाउन्सर बलमा अक्षर पटेल एज लागेर एक रनमा विकेटकिपर होपबाट क्याच आउट हुन पुगे ।

युवा तीव्र गतिका बलर जयडेन सिल्सको बलमा हार्दिक पान्ड्या मिडविकेटमा किंगबाट क्याच आउट भए । लगत्तै अर्को बलमा सन्जु स्यामसन ९ रनमा स्लिपमा क्याच आउट भएपछि भारत ९०-० बाट ११३-५ को दयनीय अवस्थामा पुगेको थियो ।

सूर्यकुमार यादव २४, रविन्द्र जडेजा १० र शार्दुल ठाकुर १६ रनमा आउट भए । वेस्टइन्डिजको जितमा रोमारियो शेफर्डले ८ ओभरमा १ मेडनसहित ३७ रन खर्चेर ३ विकेट लिए ।

गुडाकेश मोतीले ९.५ ओभरमा ३६ रन खर्चेर ३ विकेट लिए । अल्जारी जोशेफले ७ ओभरमा ३५ रन खर्चेर २ विकेट लिए । जयडेन सिल्स र यानिक कारियाहले समान एक विकेट लिए ।

पहिलो खेलमा भारत ५ विकेटले विजयी भएको थियो । तेस्रो तथा अन्तिम खेल मंगलबार हुनेछ । त्यसपछि यी दुई देशबीच पाँच टि२० आई खेलको सिरिज हुनेछ ।