एजेन्सी – इंग्ल्यान्डले आफ्नो दबदबा र आक्रामक ब्याटिङलाई निरन्तरता दिएपछि विश्व प्रतिष्ठित द एसेज सिरिजको पाँचौं तथा अन्तिम खेलमा अष्ट्रेलियाविरुद्ध बलियो योगफल बनाएको छ । इंग्ल्यान्ड तेस्रो दिनको खेल सकिँदा दोस्रो इनिङमा ८० ओभरमा ९ विकेट गुमाउँदै ३ सय ८९ रन बनाएको छ ।

क्रिजमा स्टुअर्ट ब्रोर्ड २ र जेम्श एन्डरसन ८ रनमा छन् । समग्रमा इंग्ल्यान्डले ३ सय ७७ रनको अग्रता लिएको छ । पहिलो इनिङमा इंग्ल्यान्ड मात्रै १२ रनले पछि परेको थियो ।

इंग्ल्यान्डका जो रुटले १ सय ६ बलमा ११ चौका र १ छक्कासहित ९१ रनको योगदान दिए । उनी स्पिनर टोड मर्फीको बलमा बोल्ड भएपछि शतक बनाउन ९ रनले चुकेका थिए ।

इंग्ल्यान्डले सुरुवात देखीनै सानदार प्रदर्शन गरेको थियो । ओपनर ज्याक क्रली ७६ बलमा ९ चौकासहित ७३ तथा बेन डकेट ५५ बलमा ७ चौकासहित ४२ रनमा आउट भए ।

बेन स्टोक्सले तेस्रो नम्बरमा ब्याटिङ गर्दै ६७ बलमा ३ चौका र १ छक्कासहित ४२, ह्यारी ब्रुक ७, मोईन अली २९, क्रिस वोक्स १ र मार्क वुड ९ रनमा आउट भए ।

जोनी बेयरस्टोले १ सय ३ बलमा ११ चौकासहित ७८ रनको योगदान दिए । पाँचौं विकेटका लागि रुट र बेयरस्टोले १ सय १० रनको शतकीय साझेदारी गरेका थिए ।

अष्ट्रेलियाका मिचेल स्टार्कले सर्वाधिक चार विकेट लिएका छन् । टोड मर्फी तीन, जोश हेजलवुड र प्याट कमिन्सले एक एक विकेट लिएका छन् ।

त्यसअघि अष्ट्रेलिया पहिलो इनिङमा २ सय ९५ रनमा अल आउट भएको थियो । अष्ट्रेलियाका स्टिभ स्मिथले १ सय २३ बलमा ६ चौकासहित सर्वाधिक ७१ रनको योगदान दिए । अन्य ब्याटरले भने ठूलो इनिङ खेल्न सकेनन् । ओपनर उस्मान खवाजा ४७, डेविड वार्नर २४, मार्नस लाबुसेन ९, एलेक्स केरी १० र मिचेल मार्श १६ रनमा आउट भए ।

इंग्ल्यान्डका क्रिस वोक्सले सर्वाधिक तीन विकेट लिएका थिए । स्टुअर्ट ब्रोड, मार्क वुड र जो रुटको नाममा समान दुई विकेट रह्यो ।

त्यसअघि द ओभलमा टस हारेर पहिला ब्याटिङको निम्तो पाएको इंग्ल्यान्ड मात्रै ५४.४ ओभरमा २ सय ८३ रनमा अल आउट भएको थियो । इंग्ल्यान्डका युवा ब्याटर ह्यारी ब्रुकले ९१ बलमा ११ चौका र २ छक्कासहित सर्वाधिक ८५ रनको इनिङ खेलेका थिए ।

ओपनर ज्याक क्रली २२, बेन डकेट ४१, मोईन अली ३४, जो रुट ५, बेन स्टोक्स ३, जोनी बेयरस्टो ४, मार्क वुड २८ र क्रिस वोक्सले ३६ रनको योगदान दिए ।अष्ट्रेलियाका मिचेल स्टार्कले सर्वाधिक ४ विकेट लिए ।

जोश हेजलवुड र टोड मर्फीले समान दुई विकेट लिएका थिए । पाँच खेलको सिरिजमा अष्ट्रेलिया २–१ ले अघि हुँदै एशेज ट्रफी रक्षा गर्न सफल भई सकेको छ ।