एजेन्सी – घरेलु टोली वेस्टइन्डिजले अन्तिम तथा तेस्रो ओडिआई खेलमा आज भारतसँग खेल्दैछ । खेल नेपाली समय अनुसार साँझ ७:१५ मा ब्रायन लारा क्रिकेट स्टेडियममा सुरु हुनेछ । तीन खेलको ओडिआई सिरिज १-१ को बराबरी अवस्थामा छ ।

पहिलो खेलमा भारत ५ विकेटले विजयी भएको थियो । दोस्रो खेलमा वेस्टइन्डिजले भारतलाई ६ विकेटले हराएको थियो । दोस्रो खेलमा भारतले विराट कोहली र रोहित शर्मा दुबैलाई विश्राम दिएको थियो ।

भारतले तेस्रो तथा निर्णायक खेलमा कोहली र रोहित दुबैलाई मैदान उतार्नेछ । भारतले सन् २००६ यता वेस्टइन्डिजसँग कुनैपनि ओडिआई सिरिज हारेको छैन । भारत त्यो विरासतलाई निरन्तरता दिन चाहन्छ । तर घरेलु टोली वेस्टइन्डिज भारतलाई हराउँदै १७ वर्षपछि सिरिज जित्न चाहन्छ ।

पछिल्लो पटक वेस्टइन्डिजले भारतलाई २००६ मा घरेलु मैदानमै पाँच खेलको ओडिआई सिरिज ४-१ ले जितेको थियो । तर त्यसपछि १५ ओडिआई सिरिज खेल्दा भारतलाई हराउन सकेको छैन ।

त्यो समय पाँच खेलको सिरिज ४–१ ले जित्दा वेस्टइन्डिजको टोलीमा कप्तान ब्रायन लारा, क्रिस गेल, ड्वेन ब्राभो, ड्वेन स्मिथ र दीनेश रामदीन जस्ता खेलाडी छन् ।

वेस्टइन्डिजका कप्तान शाई होप प्रमुख ब्याटर हुन् । वर्तमान समयका वेस्टइन्डिजका सर्वाधिक भरपर्दा ब्याटर होपको उत्कृष्ट प्रदर्शन विना जित कठिन देखिन्छ ।

सुरुवाती दुई खेलमा उनले ४३ र ६३ रन बनाएका छन् । दुई युवा ब्याटर केसी कार्टी र एलिक एथानाज भारतलाई स्तब्ध पार्न सक्ने खेलाडी हुन् । कार्टी र एलिक वेस्टइन्डिजको भविष्यको रुपमा हेरिएको छ ।

वेस्टइन्डिजका ब्याटहरु स्पिनमा निरन्तर संघर्ष गर्दै आएका छन् । ओपनर कायल मेयर्स र ब्रेन्डन किंगबाट राम्रो सुरुवात चाहन्छ । दुई वर्षपछि वेस्टइन्डिजको टोलीमा फर्किएका शिम्रन हेटमायरको प्रदर्शन सुरुवाती दुई खेलमा राम्रो छैन । हेटमायरबाट निर्णायक खेलमा वेस्टइन्डिज उत्कृष्ट प्रदर्शन चाहन्छ ।

तीव्र गतिका बलर रोमारियो शेफर्ड र स्पिनर गुडाकेश मोटी प्रमुख बलर हुन् । यता भारतको ब्याटिङक्रम स्थिर छैन । उक्त समस्या भारतलाई भारी पर्नसक्छ । रोहित टोलीमा फर्किदा ईशान किशन र गिल मध्य एक खेलाडीलाई विश्राम दिनसक्छ ।
सूयकुमार यादवको ओडिआईमा चौथो नम्बरमा प्रदर्शन त्यति राम्रो छैन ।

त्यसैले भारत उनलाई छैटौं नम्बरमा फिनिसरको रुपमा खेलाउने तयारी गरेको छ । दुई स्पिनर कुलदीप यादव र रविन्द्र जडेजाको प्रदर्शन महत्वपूर्ण हुनेछ । दुई टेस्ट खेलको सिरिज भारतले १-० ले जितेको थियो । ओडिआई पछि भारत र वेस्टइन्डिजबीच पाँच टि२० आई खेलको सिरिज हुनेछ ।