एजेन्सी – नेपाली क्रिकेट टोलीका स्पिनर सन्दीप लामिछाने ग्लोबल टि२० क्यानडामा सर्रे जागुअर्सबाट ब्राम्पटन वल्भ्सविरुद्ध विकेट विहीन बन्न पुगेका छन् । ब्राम्पटनले सरेलाई जितको लागि १ सय २९ रनको मध्यम लक्ष्य दिएको छ ।

टस हारेर पहिला ब्याटिङको निम्तो पाएको ब्राम्पटनले निर्धारित २० ओभरमा ९ विकेट गुमाउँदै १ सय २९ रन बनायो । उसका लागि कोलिन डि ग्रान्डहोमले ३४ बलमा ३ चौकासहित सर्वाधिक ३४ रन बनाए । आरोन जोनसन, मार्क च्यापम्यान र नितेश कुमारले समान १४ रन जोडे ।

सन्दीपले ३ ओभरमा २५ रन खर्चिदा विकेट लिन सकेनन् । सन्दीप यस सिजनमा वर्षाले प्रभावित नभएको खेलमा पहिलो पटक विकेट विहीन बनेका हुन् । आमर खालिदले ४ ओभरमा १७ रन खर्चेर २ विकेट लिए । आयन खानले ३ ओभरमा १९ रन खर्चेर २ विकेट लिए । म्याथ्यु फर्डले ४ ओभरमा २६ रन खर्चेर २ विकेट लिए ।

यस्तो रह्यो सन्दीपको तीन ओभर

सन्दीपलाई सर्रेले १० औं ओभरमा बलिङमा ल्याएको थियो । त्यो समय ब्राम्पटन ५२-४ को दयनीय अवस्थामा थियो । सन्दीपले नितेश कुमार र कोलिन डि ग्रान्डहोमलाई सुरुवाती तीन बलमा एक एक रन दिएका थिए । चौथो बलमा दुई रन दिए । बाँकी दुई बल ग्रान्डहोमलाई डट राखेका थिए ।

१२ औं ओभरको सुरुवाती दुई बलमा ग्रान्डहोमले सन्दीपलाई लगातार दुई चौका प्रहार गरेका थिए । त्यसपछि भने सन्दीपले पूनरागमन गर्दै ४ बलमा चार रन दिएका थिए । सन्दीपले सुरुवाती दुई ओभरमा १६ रन खर्चिएका थिए ।

१६ औं ओभरमा सन्दीपले ९ रन खर्चिए । दोस्रो बलमा रिजवान चिमाले सन्दीपलाई छक्का हानेका थिए । त्यसपछि भने सन्दीपलाई बलिङ गर्न दिएको थिएन ।