काठमाडौं (हाम्रो खेलकुद) – नेपाली क्रिकेट टोलीका कप्तान रोहित पौडेलले कुनैपनि खेलाडी एकै महिनामा वर्तमान समयका विश्वका दुई ब्याटर विराट कोहली र बाबर आजम नबन्ने बताएका छन् । एसिसी इमर्जिङ टिम्स एसिया कप र एसिया कपको दुई साता तयारी गरेर श्रीलंकाबाट बिहीबार स्वदेश फर्किएपछि रोहितले उक्त प्रतिक्रिया दिएका हुन् ।

‘एक महिनामा केहि पनि परिवर्तन हुँदैन । एक महिनामा कोही पनि विराट कोहली र बाबर आजम बन्दैन । त्यसको लागि विस्तारै समय लाग्छ । भनिन्छ नि जित्दा खेरी मात्तिनु हुँदैन । हार्दा आत्तिनु हुँदैन । यति बेला सबैले धैर्यता राख्न सक्नुपर्छ’, रोहितले भने ।

रोहित टेस्ट र एसोसिएट टोलीको स्तर फरक हुने बताएका छन् । ‘नेपालमा हामीले खेल्दा स्तर एसोसिएट क्रिकेट र टेस्ट टोलीमा फरक भईहाल्छ । त्यो हामीले बुझ्नुपर्ने कुरा हो । एसोसिएटमा हामी यहाँ खेल्दा सबै जित्छौं भने यो होईन की टेस्टमा जादा पनि सबै खेल जित्छौं । विशेषत अफगानिस्तानलाई हेरे हुन्छ । उनीहरु पनि सुरुसुरुमा विस्तारै सुधार गर्दै गएका थिए’, रोहितले भने ।

त्यसैमा रोहितले थपे, ‘हामी एकै पटक जादा बितिक्कै सबै टिमलाई जित्छौं भन्ने आशा गछौं । त्यो साँच्चै हुदैन जस्तो लाग्छ । किनभने अफगानिस्तान र इंग्ल्यान्डको खेल हुँदा मान्छेहरु इंग्ल्यान्डले नै जित्छ भन्छन् । अफगानिस्तानले विस्तारै सुधार गर्दै गएको छ । अनि विस्तारै विस्तारै परिवर्तन हुन्छ । एक सिरिज र महिनामा परिवर्तन हुन्छ भन्ने हुँदैन । हामी सुधार गरि राखेका छौं ।’

नेपाली क्रिकेट टोली दिउँसो १२ : ३० मा नेपाल आएको थियो । इमर्जिङ कपमा नेपाल भारत ए सँग ९ विकेट र पाकिस्तान ए सँग ४ विकेटले पराजित भएको थियो ।

युएई एलाई ३ विकेटले हराएको थियो । नेपालले अव अगष्ट ३० देखी १७ सेप्टेम्बर सम्म पाकिस्तान र श्रीलंकामा हुने एसिया कप खेल्नेछ । नेपाल समूह ए मा भारत र पाकिस्तानसँगै छ । नेपालले अगष्ट ३० मा पाकिस्तान र सेप्टेम्बर ४ मा भारतसँग खेल्नेछ ।