काठमाडौं (हाम्रो खेलकुद) – नेपाली क्रिकेट इतिहासकै एक सफल ब्याटर ज्ञानेन्द्र मल्लले शुक्रबार आफ्नो क्रिकेट करिअरबाट सन्न्यास लिएका छन् । ज्ञानेन्द्रले एक पत्रकार सम्मेलन मार्फत अन्तर्राष्ट्रिय र घरेलु दुबै क्रिकेटबाट सन्न्यास लिएका हुन् ।

आगमी महिना श्रीलंका र पाकिस्तानमा हुने एसिया कपबाट सन्न्यास लिने अनुमान गरेपनि त्यसअघि नै ज्ञानेन्द्रले घोषणा गरेका हुन् । यू१५, यू१७, यू१९ हुँदै २००६ मा नेपाली सिनियर क्रिकेट टोलीबाट खेलेका ज्ञानेन्द्रले १८ वर्ष आफ्नो अन्तर्राष्ट्रिय क्रिकेट करिअरबाट बिदा लिएका हुन् ।

३३ वर्षीय ज्ञानेन्द्रले नेपालबाट ३७ ओडिआई र ४५ टि२० आई खेल खेलेका छन् । ज्ञानेन्द्रले २०१९ देखी २०२१ सम्म नेपाली क्रिकेट टोलीको कप्तानी समेत गरेका थिए ।

झण्डै दुई दशक नेपाली क्रिकेट टोलीबाट खेल्दा ज्ञानेन्द्रले थुप्रै उत्कृष्ट इनिङ खेलेका थिए । ज्ञानेन्द्रले नेपाली क्रिकेट टोलीमा बनाएका पाँच दुर्लभ कीर्तिमान यस प्रकार छन् ।

५.टि२० आईमा छक्का प्रहार गर्ने पहिलो नेपाली खेलाडी

ज्ञानेन्द्र मल्ल टि२० आई खेलमा नेपालबाट छक्का प्रहार गर्ने पहिलो खेलाडी हुन् । नेपालले २०१४ को टि२० विश्वकपमा हङकङविरुद्ध टि२० आईमा डेब्यू गरेको थियो । ज्ञानेन्द्रले त्यसै खेलमा २० औं ओभरको पहिलो बलमा हसिब आजादलाई काउकर्नरमा छक्का प्रहार गर्दै उक्त कीर्तिमान बनाएका थिए । त्यो नेपालबाट टि२० आईमा प्रहार भएको पहिलो छक्का थियो ।ज्ञानेन्द्र नेपालबाट टि२० आईमा पहिलो छक्का प्रहार गर्ने पहिलो खेलाडी बनेका थिए ।

ज्ञानेन्द्रले ४१ बलमा ४ चौका र १ छक्कासहित ४८ तथा पारस खड्काले ४१ रन बनाएपछि नेपालले निर्धारित २० ओभरमा ८ विकेट गुमाउँदै १ सय ४९ रन बनाएको थियो । नेपालले हङकङलाई ६९ रनमा अल आउट गर्दै ८० रनको सानदार जित हात पारेको थियो ।

४.टि२० आईमा सर्वाधिक छिटो अर्धशतक

ज्ञानेन्द्र मल्ल टि२० आईमा सर्वाधिक छिटो अर्धशतक प्रहार गर्ने नेपाली ब्याटर हुन् । ज्ञानेन्द्रले आइसिसी टि२० विश्वकप एसिया क्षेत्र छनोट अन्तर्गत मलेसियाविरुद्ध २०१९ मा मात्रै २० बलमा अर्धशतक पूरा गरेका थिए । त्यो कुनैपनि नेपाली ब्याटरले टि२० आईमा सर्वाधिक छिटो अर्धशतक प्रहार गरेको कीर्तिमान हो ।

उक्त खेलमा ज्ञानेन्द्रले २१ बलमा ५ चौका र ३ छक्कासहित ५१ रन बनाएका थिए । त्यसअघि मलेसियाविरुद्ध विनोद भण्डारीले दोस्रो टि२० आई खेलमा मलेसियाविरुद्ध २५ बलको कीर्तिमान तोडेका थिए । कुशल मल्लले नेदरल्यान्ड्सविरुद्ध २०२१ मा टियु मैदानमा २४ बलमा २ चौका र ५ छक्कासहित ५० रनमा अविजित इनिङ खेलेका थिए ।

३.ओडिआईमा अर्धशतक प्रहार गर्ने पहिलो नेपाली

ज्ञानेन्द्र ओडिआईमा पहिलो अर्धशतक प्रहार गर्ने पहिलो नेपाली खेलाडी हुन् । सन् २०१८ अगष्टमा नेपालले ऐतिहासिक ओडिआई खेलमा डेब्यू गर्दा ज्ञानेन्द्रले नेदरल्यान्ड्सविरुद्ध ६१ बलमा ८ चौकासहित ५१ रनको इनिङ खेलेका थिए ।
टि२० आईमा भने पहिलो अर्धशतक प्रहार गर्ने ब्याटर सुवास खकुरेल हुन् ।

खकुरेलले २०१४ को टि२० विश्वकपमा अफगानिस्तानविरुद्ध ५६ रन बनाएका थिए । नेपाली क्रिकेट इतिहासमै पहिलो अर्धशतक भने पवन अग्रवालले प्रहार गरेका थिए । पूर्वकप्तान पवनले १९९६ को एसिसी ट्रफीमा ब्रुनाईविरुद्ध ८० रनको इनिङ खेलेका थिए ।

२.अन्तर्राष्ट्रिय क्रिकेटमा नेपालबाट सर्वाधिक छिटो अर्धशतक

ज्ञानेन्द्र नेपाली क्रिकेट इतिहासमा कुनैपनि अन्तर्राष्ट्रिय खेलमा सर्वाधिक छिटो अर्धशतक प्रहार गर्ने खेलाडी हुन् । ज्ञानेन्द्रले २०१२ मा साउदी अरेवियाविरुद्ध एसिसी इलिट ट्रफीमा मात्रै १८ बलमा अर्धशतक पूरा गरेका थिए । त्यो कुनैपनि नेपाली ब्याटरले पूरा गरेको सर्वाधिक छिटो अर्धशतक हो ।

त्यसपछि ज्ञानेन्द्रले नै टि२० आईमा २० बलमा २०१९ मा मलेसिया र आसिफ शेखले ओडिआईमा २१ बलमा २०२३ मा पपुवा न्युगिनीविरुद्ध अर्धशतक पूरा गरेका थिए ।

घरेलु क्रिकेटमा ५० ओभरको राष्ट्रिय मान्यता प्राप्त खेलमा नेपाल पुलिस क्लबबाट पवन सरार्फले १३ बलमा लुम्बिनीविरुद्ध २०२१ मा पूरा गरेका थिए । टि२० घरेलु क्रिकेटमा नेपाल एपिएफ क्लबबाट आर्मीविरुद्ध लोकेश बमले १४ बलमा अर्धशतक प्रहार गरेका थिए ।

१.एकै ओभरमा लगातार ६ चौका प्रहार गर्ने एक्लो नेपाली क्रिकेटर

ज्ञानेन्द्र नेपाली क्रिकेट इतिहासमा एकै ओभरमा लगातार ६ चौका प्रहार गर्ने एक्लो नेपाली क्रिकेटर हुन् । ज्ञानेन्द्रले साउदी अरेवियाविरुद्ध २०१२ मा एसिसी ट्रफी इलिटमा दशौं ओभरमा नदिम जावेदलाई लगातार ६ चौका प्रहार गरेका थिए । उनी बाहेक अन्य कुनैपनि नेपाली ब्याटरले एकै ओभरमा ६ बाउन्ड्री प्रहार गरेका छैनन् ।