काठमाडौं (हाम्रो खेलकुद) ( भारतीय पूर्व महिला क्रिकेटर देविका पाल्शिकर राष्ट्रिय महिला क्रिकेट टोलीको ब्याटिङ प्रशिक्षकको रुपमा नेपाल आउने भएकी छिन् । नेपालले अगष्ट र सेप्टेम्बरमा मलेसियामा हुने आइसिसी वुमन्स विश्वकप टि२० एसिया क्षेत्र छनोटको लागि देविकालाई ब्याटिङ प्रशिक्षकको रुपमा ल्याउने भएको छ ।

क्यान स्रोतका अनुसार उनी आज नै नेपाल आउँदैछिन् । नेपालले २४ सदस्य टोली बन्द प्रशिक्षणमा यसअघि नै बोलाई सकेको छ । महिना राष्ट्रिय खेलकुद परिषद् (राखेप) का स्यामसन जंग थापाले महिला टोलीको मुख्य प्रशिक्षकको रुपमा हेर्दै आएका छन् ।

देविकाले भारतबाट एक महिला टेस्ट र १५ महिला ओडिआई खेल खेलेकी छिन् । उनी गतवर्ष भारतीय क्रिकेट बोर्ड बिसिसिआईले आयोजना गरेको वुमन्स प्रिमियर लिग (डब्लूपिएल)मा मुम्बई इन्डियन्सको महिला टोलीको ब्याटिङ प्रशिक्षकको रुपमा समेत काम गरेकी थिइन् ।

नेपालले पहिलो पटक विदेशबाट नेपाली महिला क्रिकेटरलाई प्रशिक्षक लिएको थियो । यसअघि कुनैपनि भूमिकामा विदेशी प्रशिक्षकले नेपाली महिला क्रिकेट टोली हेरेका थिएनन् ।

प्रतियोगिता मलेसियामा अगष्ट ३१ देखी ९ सेप्टेम्बर सम्म हुनेछ । प्रतियोगिताको समूह ए मा आयोजक मलेसियासँगै नेपाल, बहराइन, भुटान, कतार र युएई छन् । समूह बी मा चीन, हङकङ, कुवेत, थाईल्यान्ड र म्यानमार छन् । प्रतियोगिता हरेक समूह शीर्ष दुई टोली सेमिफाइनलमा पुग्नेछन् । फाइनलमा पुग्ने दुई टोलीले ग्लोबल क्वालिफायर खेल्न पाउनेछन् ।

ग्लोबल महिला टि२० विश्वकपमा आयोजक श्रीलंका र आयल्यान्डसँगै पाँच क्षेत्रिय छनोटबाट आउने आठ टोली गरि कुल १० टोलीले प्रतिस्पर्धा गर्नेछन् । शीर्ष दुई टोलीले बंगलादेशमा हुने विश्वकप खेल्न पाउनेछन् ।

२०२४ को महिला टि२० विश्वकप बंगलादेशमा हुनेछ । बंगलादेशमा हुने विश्वकपमा गतवर्ष दक्षिण अफ्रिकामा सम्पन्न महिला टि२० विश्वकपका शीर्ष ६ टोली दक्षिण अफ्रिका, अष्टेलिया, इंग्ल्यान्ड, भारत, न्युजिल्यान्ड र वेस्टइन्डिज सोझै छनोट भएका थिए। पाकिस्तान वरियताको आधारमा विश्वकपमा पुगेको थियो । बंगलादेश आयोजक हुँदा स्वत छनोट भएको छ । आठ टोलीले विश्वकपमा स्थान बनाई सकेका छन् ।