काठमाडौं (हाम्रो खेलकुद) – नेपालले यसै वर्ष अन्तिममा घरेलु मैदानमा हुने टि२० विश्वकप एसिया क्षेत्र छनोलाई ध्यानमा राख्दै ६ नेपाली क्रिकेट खेलाडीलाई भारतमा अभ्यास प्रशिक्षण गराउने भएको छ ।

नेपालले विकेटकिपर विनोद भण्डारी, तीव्र गतिका बलर कमलसिंह ऐरी, स्पिनर सागर ढकाल, अलराउन्डर विवेक यादव, आक्रामक ब्याटर लोकेश बम र बायाँ हाते तीव्र गतिका बलर कमल खत्रीलाई भारतको दिल्लीमा पठाउने भएकोछ । यी ६ खेलाडी त्यसतर्फ लागि सकेका छन् । सिनियर टोलीमा नभएका खेलाडीलाई भारतमा पठाउने भएको हो ।

विकेटकिपर विनोद भण्डारी र अलराउन्डर विवेक यादव भने दुई महिनापछि चीनमा हुने १९ औं एसियाली खेलकुदको लागि नेपाली क्रिकेट टोलीमा छन् । अन्य खेलाडी भने नेपालको टोलीमा छैनन् । तीव्र गतिका बलर कमलसिंह ऐरी सिनियर टोलीमा पूनरागमनको पर्खाईमा छन् ।

उत्कृष्ट लयमा रहेको अवस्थामा गतवर्ष टियुमा घाइते भएपछि कमलले टोलीमा पूनरागमन गर्न सकेका छैनन् । उनी नेपालको बन्द प्रशिक्षणमा बने निरन्तर पर्दै आएका छन् । बायाँ हाते तीव्र गतिका बलर कमल खत्री भने सिनियर टोलीको बन्द प्रशिक्षणमा हालसम्म परेका छैनन् । तर नेपालले नेट बलरको रुपमा निरन्तर प्रयोग गर्दै आएको छ ।

कोशी प्रदेशका कमल बायाँ हाते बलरको रुपमा चिनिन्छन् । शरीरिको उचाई हुँदा नेपाल उनलाई तयार पार्न खोजेको छ । विवेकले सिनियर टोलीमा पर्याप्त मौका पाउन सकेका छैनन् ।

स्पिनर सागर र आक्रामक ब्याटर लोकेश बम पनि सिनियर टोलीमा पूनरागमन गर्न सकेका छैनन् । यी ६ खेलाडीले एक महिना सम्म भारतमा रहेर अभ्यास गर्नेछन् । भारतीय अलराउन्डर प्रदीप साहुको मुख्य प्रशिक्षकमा नेपाली खेलाडीले अभ्यास गर्नेछन् । नेपाली क्रिकेट टोलीका मुख्य प्रशिक्षक मोन्टी देशाईंले खेलाडीहरुको अभ्यास निरिक्षण गर्नेछन् । नेपालले टि२० विश्वकपलाई विशेष ध्यानमा राखेको छ ।

अक्टोबर ३० देखी ९ नोभेम्बरसम्म हुने एसिया क्षेत्र छनोटबाट आयोजक नेपाल, मलेसिया हङकङ, युएई, ओमान, सिंगापुर, बहराइन र क्वालिफायर ए र बी बाट आउने दुई टोली हुनेछन् । एसिया छनोट ए मा कुवेत, माल्दिभ्स, कतार र साउदी अरेविया छन् । एसिया छनोटबाट विजेता टोली नेपाल आउनेछ ।

अमेरिका, वेस्टइन्डिज, अष्ट्रेलिया, इंग्ल्यान्ड, भारत, नेदरल्यान्ड्स, न्युजिल्यान्ड, पाकिस्तान, दक्षिण अफ्रिका, श्रीलंका, अफगानिस्तान, बंगलादेश, स्कटल्यान्ड, आयरल्यान्ड र पपुवा न्युगिनीले विश्वकपमा स्थान बनाई सकेका छन् ।

नेपालको सिनियर टोलीले अगष्ट ३० देखी सेप्टेम्बर १७ सम्म हुने एसिया कप खेल्नेछ । एसिया कपको समूह ए मा भारत, पाकिस्तान र नेपाल छन् । नेपालले ३० अगष्टमा पाकिस्तान र ४ अगष्टमा पाकिस्तानसँग खेल्नेछ । नेपालको सिनियर टोली १५ दिन विशेष प्रशिक्षण गरेर श्रीलंकाबाट फर्कि सकेको छ ।

नेपालले अव चाँडै नै एसिया कपको लागि नेपालमा तयारी थाल्नेछ । नेपालले विश्वकप छनोट अघि घरेलु मैदानमा वेस्टइन्डिजसँग सिरिज खेल्ने सम्भावना पनि धेरैछ ।