एजेन्सी – भारतले ब्याटिङमा कमजोर प्रदर्शन गरेपछि दोस्रो टि२० आई खेलमा घरेलु टोली वेस्टइन्डिजलाई १ सय ५३ रनको मध्यम लक्ष्य दिएको छ । गयानामा टस जितेर पहिला ब्याटिङ रोजेको भारतले निर्धारित २० ओभरमा ७ विकेट गुमाउँदै १ सय ५२ रन बनायो ।

भारतका तिलक बर्माले ४२ बलमा ५ चौका र १ छक्कासहित सर्वाधिक ५१ रनको योगदान दिए । ओपनर ईशान किशन २३ बलमा २ चौका र २ छक्कासहित २७ रनमा आउट भए । अन्य कुनैपनि ब्याटरले राम्रो प्रदर्शन गर्न सकेनन् ।

ओपनर शुभमन गिल अल्जारी जोशेफको बलमा एज लागेर डिप मिडविकेटमा शिम्रन हेटमायरबाट ७ रनमा क्याच आउट भए । कायल मेयर्सले सूर्यकुमार यादवलाई एक रनमा उत्कृष्ट डाइरेक्ट थ्रोका साथ पेभेलिएन फर्काएका थिए ।

त्यसपछि भारतीय ब्याटरले खुलेर खेल्न सकेनन् । कप्तान हार्दिक पान्ड्या १८ बलमा २ छक्कासहित २४, सन्जु स्यामसन ७ र अक्षर पटेल १४ रनमा आउट भए । रवि विश्रोई ८ र अर्शदीप सिंह ६ रनमा नट आउट भए ।

वेस्टइन्डिजका अकिल हुसैनले ४ ओभरमा २९ रन खर्चेर २ विकेट लिए । अल्जारी जोशेफले २ ओभरमा २८ रन खर्चेर २ विकेट लिए । रोमारियो शेफर्डले ३ ओभरमा २८ रन खर्चेर २ विकेट लिए ।

पाँच खेलको सिरिजमा वेस्टइन्डिज १-० ले अघि छ । पहिलो खेलमा वेस्टइन्डिज चार रनले विजयी भएको थियो ।