एजेन्सी – पाकिस्तान क्रिकेट टोलीका कप्तान बाबर आजमले टि२० क्रिकेटमा अर्को शतक हानेका छन् । बाबरले लंका प्रिमियर लिगमा कोलोम्बो स्ट्राइकर्सलाई गाले टाइटन्सविरुद्ध ७ विकेटको जित दिलाउन शतक हानेका हुन् ।

जितको लागि १ सय ८९ रनको विजयी लक्ष्य कोलोम्बोले १९.५ ओभरमा ३ विकेट गुमाउँदै पूरा गर्यो । कोलोम्बोको जितमा बाबर आजमले ५९ बलमा ८ चौका र ५ छक्कासहित १ सय ४ रनको शतकीय इनिङ खेले । यो उनको टि२० करिअरको १० औं शतक हो ।

टि२० क्रिकेटमा सर्वाधिक शतक बनाउने कीर्तिमानमा अब बाबरले वेस्टइन्डिजका क्रिस गेललाई मात्रै पछि पार्न बाँकी छ । गेलले टि२० क्रिकेटमा २२ शतक हानेका छन् । विराट कोहली, आरोन फिन्च, डेविड वार्नर र माइकल किलिंगरले समान ८-८ शतक हानेका छन् ।

ओपनर पाथुम निसांकाले ४० बलमा ५ चौका र १ छक्कासहित ५४ रन बनाए । पहिलो विकेटका लागि पाथुम निसांका र बाबर आजम १२.३ ओभरमा १ सय ११ रनको शतकीय साझेदारी गरेका थिए ।

त्यसअघि टस हारेर पहिला ब्याटिङको निम्तो पाएको गालेले निर्धारित २० ओभरमा ३ विकेट गुमाउँदै १ सय ८८ रन बनाएको थियो । टिम सिफर्टले ३५ बलमा ४ चौका र ३ छक्कासहित सर्वाधिक ५४ रन बनाए । भानुका राजपक्षे ३०, शेभन ड्यानियलले ४९ र लासिथ क्रुसपुलले ३६ रन बनाए ।

प्रतियोगितामा कोलोम्बो ४ खेलमा २ खेलमा जित र २ खेलमा हारसहित ४ अंकका साथ नेटरनरेटको कारण तेस्रो स्थानमा छ । समान चार खेलमा सहभागी सबै पाँचौं टोलीको समान चार अंक भएपनि नेटरनरेटको कारण डम्बुल्ला अरुरा शीर्ष, गाले दोस्रो, जाफ्ना किंग्स चौथो र बी लभ कान्डी पुछारमा छन्।