एजेन्सी – भारतले तेस्रो टि२० आई खेलमा आज घरेलु टोली वेस्टइन्डिजसँग खेल्दैछ । खेल नेपाली समय अनुसार साँझ ८ ः १५ मा गयानामा सुरु हुनेछ । पाँच टि२० आई खेलको सिरिजमा वेस्टइन्डिज २–० ले अघि छ । आजको खेलमा वेस्टइन्डिज विजयी भएका दुई खेल अगावै सिरिज जित्नेछ ।

उता भारत गर वा मरको अवस्थामाछ । भारतले आज हारेको खण्डमा खराब कीर्तिमान बनाउने छ । टि२० आई इतिहासमा भारतले हालसम्म कुनैपनि टोलीसँग लगातार तीन खेल हारेको छैन । भारतलाई त्यो साख जोगाउन निकै चुनौती हुनेछ । भारतले वेस्टइन्डिजसँग २०१७ यता टि२० आई सिरिज पनि हारेको छैन ।

ब्याटिङ भारतको लागि चिन्ताको विषय बनेको छ । सुरुवाती दुई खेलको प्रदर्शन हेर्दा भारतीय टोलीमा आज परिवर्तनको सम्भावना छ । युवा ब्याटर यशस्वी जैसवाललाई भारतले डेब्यू दिने सम्भावना छ ।

इन्डियन प्रिमियर लिग (आइपिएल) मा राजस्थान रोयल्सबाट सानदार प्रदर्शन गरेका जैसवाललाई शुभमन गिललाई बेन्चमा राख्ने सम्भावना छ । टोलीमा अन्य भने परिवर्तनको सम्भावना कमछ ।

सूर्यकुमार यादव टोलीका प्रमुख ब्याटर हुन् । उनीबाट भारत उत्कृष्ट प्रदर्शनको अपेक्षा राख्नेछ । सन्जु स्यामसनलाई पनि पाएको अवसर सदुपयोग गर्नुपर्ने चुनौती छ । युवा ब्याटर तिलक बर्माले सुरुवाती दुबै खेलमा राम्रो प्रदर्शन गरेका छन् ।

युजभेन्द्र चहल र अर्शदीप सिंह प्रमुख बलर हुन् । कप्तान हार्दिक पान्ड्याको कप्तानीमा पनि प्रश्न उठ्न थालेको छ । दोस्रो खेलमा चहलले एकै ओभरमा दुई विकेट लिएपछि अर्को ओभर नदिँदा आलोचित भएका थिए । अक्षर पटेललाई पनि बलिङमा गर्नुपर्ने सदुपयोग नगरेको आलोचना खेप्नु परेको थियो ।

उता निकोलस पुरन पछिल्लो समय राम्रो लयमा छन् । दोस्रो खेलमा पुरनले ४० बलमा ६७ रन बनाउँदै जितको आधार तय गरेका थिए । पुरनको प्रदर्शन वेस्टइन्डिजका लागि निकै महत्वपूर्ण हुनेछ । वर्तमान समयका स्पिन राम्रो खेल्ने ब्याटरमा पुरनको नाम अग्रस्थानमा छ । पुरनको लय भारतलाई पुन भारी पर्न सक्छ ।

ओपनर ब्रेन्डन किंगको स्थानमा शाई होपलाई मौका दिनसक्छ । किंगको प्रदर्शन राम्रो हुन सकेको छैन । शिम्रन हेटमायर, पुरन र रोभम्यान पावेल प्रमुख ब्याटर हुन् ।

रोमारियो शेफर्ड, अल्जारी जोशेफ र ओबेद म्याककोय प्रमुख तीव्र गतिका बलर हुन् । स्पिन आक्रामण अकिल हुसैनले सम्हाल्नेछन् । चौथो र पाँचौं खेल शनिबार र आइतबार हुनेछ ।