एजेन्सी – भारतीय युवा बायाँ हाते ब्याटर यशस्वी जैसवालले तेस्रो टि२० आई खेलमा घरेलु टोली वेस्टइन्डिजविरुद्ध भारतीय टि२० आई खेलमा डेब्यू गरेका छन् । वेस्टइन्डिजका कप्तान रोभम्यान पावेलले टस जितेर पहिला ब्याटिङ गर्ने निर्णय लिएका छन् ।

भारतले टोलीमा दुई परिवर्तन गर्दा जैसवाललाई डेब्यू दिएको छ । ईशान किशनलाई बेन्चमा राख्दै जैसवालले मौका पाएका छन् । गिल र जैसवालले ओपनिङ गर्ने छन् । सुरुवाती दुई खेलमा खराब प्रदर्शनका साथ भारतले किशनलाई बाहिर राख्दै जैसवाललाई डेब्यू दिएको हो ।

त्यस्तै रवि विश्रोईको स्थानमा कुलदीप यादव टोलीमा फर्किएका छन् । पछिल्लो खेलमा घाइते भएका जेसन होल्डरको स्थानमा रोश्टन चेश आएका छन् । भारतले दुई र वेस्टइन्डिजले टोलीमा एक परिवर्तन गरेको छ । पाँच खेलको सिरिजमा वेस्टइन्डिज २-० ले अघि छ ।

जैसवालले वेस्टइन्डिजविरुद्ध पहिलो टेस्ट खेलमा डेब्यू गर्दै १ सय ७१ रनको सानदार शतकीय इनिङ खेलेका थिए । इन्डियन प्रिमियर लिग (आइपिएल) मा राजस्थान रोयल्सबाट सानदार प्रदर्शन गरेका जैसवाल पहिलो पटक भारतीय टोलीमा परेका थिए ।

जैसवालले यस सिजनको आइपिएलमा १४ खेलमा १ शतक र ५ अर्धशतकसहित ६ सय २५ रन बनाएका थिए । २१ वर्षीय ओपनर जैसवालले कोलकाता नाइट राइडर्सविरुद्ध ४७ बलमा १२ चौका र ५ छक्कासहित ९८ रनको इनिङ खेलेका थिए ।

जसक्रममा उनले १३ बलमै अर्धशतक हानेका थिए । जुन आइपिएल इतिहासकै सर्वाधिक छिटो बलमा अर्धशतक थियो । जैसवालले घरेलु क्रिकेटमा पनि त्यतिनै उत्कृष्ट प्रदर्शन गर्दै आएका छन् । उनले २०२० को भारतीय यू१९ विश्वकप टोलीबाट उत्कृष्ट प्रदर्शनका साथ सर्वोत्कृष्ट खेलाडी चुनिएका थिए ।