एजेन्सी – कप्तान वानिन्दु हसरंगाको सानदार अलराउन्ड प्रदर्शनमा बी लभ कान्डीले लंका प्रिमियर लिगमा गाले टाइटन्सलाई ८९ रनको फराकिलो अन्तरले हराएको छ । यो जितसँगै कान्डी ५ खेलमा ३ मा जितसहित शीर्षस्थानमा उक्लिएको छ ।

जितको लागि २ सय ४ रनको विशाल विजयी लक्ष्य पछ्याएको टाइटन्स १६.४ ओभरमा १ सय १४ रनमा अल आउट भयो । टाइटन्सका लागि लाहिरु समराकुनले २५ बलमा १ चौका र ४ छक्कासहित सर्वाधिक ३६ रन बनाए । एशान प्रियन्जनले २५ र लासिथ क्रुसपुलले २७ रन बनाए । अन्य कुनैपनि ब्याटरले सम्झन लायक प्रदर्शन गर्न सकेनन् ।

वानिन्दु हसरंगाले ३.४ ओभरमा १७ रन खर्चेर ४ विकेट लिए । नुवान प्रदीपले ३ ओभरमा २१ रन खर्चेर ३ विकेट लिए । मुजिब उर रहमानले ४ ओभरमा २६ रन खर्चे २ विकेट लिए ।

त्यसअघि टस हारेर पहिला ब्याटिङको निम्तो पाएको कान्डीले निर्धारित २० ओभरमा ५ विकेट गुमाउँदै २ सय ३ रन बनाएको थियो । हसरंगाले २७ बलमा ९ चौका र २ छक्कासहित सर्वाधिक ६४ रन बनाए । हसरंगाले १८ बलमै अर्धशतक पूरा गरेका थिए ।

फखार जमान ३५ बलमा ३ चौका र २ छक्कासहित ४५, दीनेश चान्डिमल २५ र मोहम्मद हरिस १७ रनमा आउट भए । एन्जिलो म्याथ्युज २३ बलमा ३ चौका र २ छक्कासहित ४० रनमा आउट भए । टाइटन्सका लाहिरु समाराक्रुनले ४ ओभरमा ३१ रन खर्चेर सर्वाधिक २ विकेट लिए ।