एजेन्सी– ओपनर यशस्वी जैसवाल र शुभमन गिलको कीर्तिमानी ब्याटिङमा भारतले चौथो टि२० आई खेलमा घरेलु टोली वेस्टइन्डिजमाथि ९ विकेटको सानदार जित हात पारेको छ । योसँगै पाँच टि२० आई खेलको सिरिज २-२ को बराबरीमा पुगेको छ ।

जितको लागि १ सय ७९ रनको मध्यम विजयी लक्ष्य भारतले १७ ओभरमा १ विकेट गुमाउँदै पूरा गर्यो । भारतको जितमा यशस्वी जैसवाल ५१ बलमा ११ चौका र ३ छक्कासहित ८४ रनमा नटआउट रहे ।

अर्का ओपनर शुभमन गिल ४७ बलमा ३ चौका र ५ छक्कासहित ७७ रनमा आउट भए । पहिलो विकेटका लागि गिल र जैसवालले १५.३ ओभरमा १ सय ६५ रनको साझेदारी हो ।

भारतीय टि२० आईमा ओपनरले गरेको यो संयुक्त रुपमा उच्च साझेदारी हो । २०१७ मा रोहित शर्मा र लोकेश राहुलले श्रीलंकाविरुद्ध पहिलो विकेटका लागि १ सय ६५ रनको साझेदारी गरेका थिए ।

भारतबाट टि२० आईमा उच्च साझेदारी २०२२ मा आयरल्यान्डविरुद्ध सन्जु स्यामसन र दीपक हुडाले दोस्रो विकेटका लागि १ सय ७६ रनको साझेदारी गरेका थिए । तिलक बर्मा ५ बलमा १ चौकासहित ७ रनमा नट आउट रहे ।

त्यसअघि टस जितेर पहिला ब्याटिङ रोजेकोे वेस्टइन्डिजले निर्धारित २० ओभरमा ८ विकेट गुमाउदै १ सय ७८ रन बनाएको थियो । वेस्टइन्डिजका बायाँ हाते ब्याटर शिम्रन हेटमायरले ३९ बलमा ४ छक्का र ३ चौकासहित सर्वाधिक ६१ रनको योगदान दिए ।

यस सिरिजमा पहिलो खेलमा मौका पाएका शाई होपले २९ बलमा २ छक्का र ३ चौका सहित ४५ रनमा आउट भए । होप र हेटमायर बाहेक अन्य कुनैपनि ब्याटरले राम्रो प्रदर्शन गर्न सकेनन् ।

वेस्टइन्डिजलाई ओपनर कायल मेयर्सले ७ बलमा २ चौका र १ छक्कासहित १७ रन जोड्दै आक्रामक सुरुवात दिलाएका थिए । मेयर्स दोस्रो ओभरमै अर्शदीपसिंहको बलमा उपरकट खेल्ने धुनमा विकेटकिपर सन्जु स्यामसनबाट आउट भएका थिए ।

अर्को ओपनर बे्रन्डन किंग १६ बलमा २ छक्का सहित १८ रनमा क्याच आउट भए । उनि पनि अर्शदीप सिंहकै बलमा कुलदीप यादकको हात बाट समातिन पुगे । उच्च लयमा रहेका निकलस पुरन स्पिनर कुलदीप यादबको बलमा ठूलो सट खेल्ने धुनमा सुर्यकुमार यादवबाट क्याच आउट भएपछि वेस्टइन्डिज समस्यामा परेका थिए ।

कप्तान रोभम्यान पावेल १, रोमारियो शेफर्ड ६, ओडियन स्मिथ १५ र अकिल हुसैनले ५ रन बनाए । भारतका युवा तीव्र गतिका बलर अर्शदीप सिंहले ४ ओभरमा ३८ रन खर्चेर सर्वाधिक ३ विकेट लिए ।

स्पिनर कुलदीप यादबले ४ ओभरमा २६ रन खर्चेर २ विकेट लिए । युजभेन्द्र चाहल, मुकेश कुमार र अक्षर पटेलले एक एक विकेट लिए । पाँचौं तथा निर्णायक खेल आज राती हुनेछ ।