काठमाडौं (हाम्रो खेलकुद) – नेपाली महिला क्रिकेट टोलीले दुई सातापछि मलेसियामा हुने आइसिसी महिला टि२० विश्वकप एसिया छनोट अघि थाईल्यान्डसँग अभ्यास खेल खेल्ने भएको छ । नेपाल र थाईल्यान्डबीचको अभ्यास खेल २८ अगष्टमा खेल्ने नेपाल क्रिकेट संघ (क्यान) ले जनाएको छ ।

नेपालले थाईल्यान्डसँग खेल्न अघि कुवेत, मलेसिया र हङकङ सम्मिलित चार देशबीचको महिला टि२० आई सिरिज खेल्ने पनि छ । नेपाल, कुवेत, मलेसिया र हङकङबीच डब्लूटि२०आई सिरिज हुनेछ ।

नेपालले २२ अगष्टमा हङकङ, २३ अगष्टमा कुवेत र २५ अगष्टमा मलेसियासँग खेल्नेछ । यदी नेपाल शीर्ष दुईमा रहन सके फाइनल २६ अगष्टमा खेल्नेछ । पुछारमा रहने दुई टोलीले पनि तेस्रो र चौथो स्थानको लागि सोही दिन खेल्नेछन् ।

एसिया क्षेत्र छनोट अगष्ट ३१ देखी ९ सेप्टेम्बरमा मलेसियामा खेल्नेछ । नेपालको समूहमा युएई, कतार, मलेसिया, भुटान र बहराइन छन् ।

समूह बी मा चीन, हङकङ, कुवेत, म्यानमार र थाईल्यान्ड छन् । शीर्ष दुई टोली सेमिफाइनल खेल्नेछन् । फाइनल पुग्ने दुई टोलीले २०२४ मा ग्लोबल महिला टि२० विश्वकप खेल्न पाउनेछन् ।

नेपालले पहिलो खेलमा ३१ अगष्टमा मलेसिया, १ सेप्टेम्बरमा बहराइन, ३ सेप्टेम्बरमा भुटान, ४ सेप्टेम्बरमा कतार र ६ सेप्टेम्बरमा युएईसँग खेल्नेछ ।

सेमिफाइनल ८ सेप्टेम्बर र फाइनल ९ सेप्टेम्बरमा हुनेछ । नेपालले रुविना क्षेत्री बेलबासेको कप्तानीमा अन्तिम १४ सदस्य टोली पनि घोषणा गरि सकेको छ ।

नेपालको टोली :

रुविना क्षेत्री (कप्तान), सीता रानामगर, इन्दु बर्मा, विन्दु रावल, कविता कुँवर, कविता जोशी, पुजा महतो, सम्झना खड्का, ईश्वरी विष्ट, काजोल श्रेष्ठ, रुवी पोदार, अप्सरी बेगम, अश्मिना कर्माचार्य र खुशी डंगोल ।