भूपेन्द्र जिसी, काठमाडौं

नरेश बुढाएर एक समय नेपाली क्रिकेटमा ठूलो आशा बोकेका युवा खेलाडी थिए । सधैं कमजोर रहने नेपाली ब्याटिङमा उनलाई पनि त्यसको समाधानको रुपमा हेरिएको थियो । सन् २०१४ मा नेपालले बंगलादेशमा ऐतिहासिक टि२० विश्वकप खेल्दा उनी हङकङ, बंगलादेश र अफगानिस्तान गरी तीनै टोलीविरुद्ध खेल्ने अवसर पाएका थिए ।

२००९ मा युएईमा सम्पन्न एसिसी टि२० कपमा नरेशले बहराइनविरुद्ध नेपालको लागि डेब्यू गरे । २०१० मा नेपालका एक सर्वाधिक सफल प्रशिक्षक रोय डायसले विदा लिने निर्णय लिए । त्यसपछि केहि समय नरेश नेपाली टोलीमा परेनन् । नरेशले २००९ देखी २०१६ सम्म नेपाली टोलीबाट खेले ।

१६ वर्षकै कलिलो उमेरमा नेपाली टोलीको जर्सीमा खेल्ने अवसर पाएका उनी २०१६ अप्रिलमा टियु क्रिकेट मैदानमा आइसिसी विश्व क्रिकेट लिग च्याम्पियनसिपमा नामिबियाविरुद्ध नेपालका लागि अन्तिम खेल खेले । नामिबियाका अलराउन्डर जे जे स्मितको बलमा ६ रनमा एलबीडब्लु आउट भएका नरेश त्यसपछि नेपाली जर्सीमा फर्किएनन् ।

अव फर्किने कुनै सम्भावना पनि छैन । २०१८ सम्म उनले नेपालमा घरेलु क्रिकेट खेलेका थिए । त्यसपछि भने उनले नेपालमा आफ्नो भविष्य राम्रो देखेनन् । अनि क्यानडा लागे । नरेश नेपालका पुर्व प्रशिक्षक पुबुदु दासानायिका सुरुवात देखीनै मिल्ने र प्रीय खेलाडी थिए । पुबुदुकै एकेडेमीमा काम गर्न उनी क्यानडा लागेका थिए । अहिले नरेश क्यानडामा घरेलु क्रिकेट खेल्न ब्यस्त छन् ।

अव नरेशले क्यानडाबाट नेपालविरुद्ध नै डेब्यू गर्ने सम्भावना छ । नरेश गतवर्ष क्यानडा राष्ट्रिय क्रिकेट टोलीको बन्द प्रशिक्षणमा समेत परेका थिए । उनले त्यहाँको डिभिजन फोरको लिगमा ६५ बलमा २३ चौका र १६ छक्कासहित २ सय १० रनको विष्फोटक दोहोरो शतकीय इनिङ खेलेका थिए ।

३१ वर्षीय उनले क्यानडाको घरेलु क्रिकेटमा राम्रो प्रभाव छाड्दै आएका छन् । गतवर्ष जुनमा पुबुदुले नेपाली क्रिकेटबाट राजीनामा दिँदै क्यानडा लागेका थिए । पुबुदु क्यानडा मुख्य प्रशिक्षक बनेपछि नरेशलाई गतवर्ष सेप्टेम्बरमा बन्द प्रशिक्षणमा बोलाइएको थियो । तर क्यानडाको अन्तिम टोलीमा स्थान बनाउन भने सकेका थिएनन् ।

नेपालविरुद्ध नै ओडिआईमा डेब्यू गर्ने उच्च सम्भावना

नरेशले नेपालविरुद्ध टियु क्रिकेट मैदानमा क्यानडाबाट ओडिआईमा डेब्यू गर्ने उच्च सम्भावना छ । गत अप्रिलमा नामिबियामा भएको आइसिसी क्वालिफायर प्लेअफबाट क्यानडाले ओडिआई मान्यता फिर्ता गरेको थियो । ओडिआई मान्यता पाएसँगै नेपाल र क्यानडाले एकअर्काबीच होम अवे सिरिज खेल्ने सम्भावना उच्च छ ।

पुबुदु नेपाली क्रिकेटमा दुई पटक मुख्य प्रशिक्षक बनिसकेका छन् । क्यान पदाधिकारी, कर्माचारी र खेलाडीसँग पुबुदुको राम्रो सम्बन्ध हुँदा सिरिजको लागि पहल गर्ने उच्च सम्भावना छ । अर्कोतर्फ ओडिआई मान्यतासँगै अव क्यानडाले आइसिसी विश्वकप लिग २ खेल्नेछ । यसपटक देखि विश्वकप लिग-२ मा ८ टोली ( नेपाल, स्कटल्यान्ड, ओमान, अमेरिका, नामिबिया, नेदरल्यान्ड्स, युएई र क्यानडा) हुनेछन् । लिग २ कुन ढाँचामा खेलाउने आइसिसीले खुलाएको छैन । तर हरेक टोलीले होम अवे सिरिज खेल्ने पक्का छ ।

दुई देशबीचको सिरिज वा लिग २ मध्य एकमा क्यानडा नेपालमा ओडिआई खेल्न आउने पक्का देखिन्छ । नेपाल पनि क्यानडा जाने सम्भावना देखिन्छ । क्यानडा नेपाल आउँदा नरेश पहिलो रोजाईमा पर्नसक्छन् । नरेशलाई नेपाली खेलाडी, टियु मैदान र नेपालको वातावरण सम्बन्धी राम्रोसँग जानकारी छ । त्यसैको कारण पनि क्यानडाले नरेशलाई टोलीमा समेट्ने मजबुत सम्भावना देखिन्छ ।

अर्कोतर्फ मुख्य प्रशिक्षक पुबुदु नरेशका प्रीय व्यक्ति हुन् । उनकै एकेडेमीमा काम गर्दै र खेल्दै आएका छन् । त्यसैले गर्दा पनि नरेशलाई पुबुदुले मौका दिने सम्भावना देखिन्छ । लिग-२ मा लगातार खेल खेल्ने हुदा दक्षिण एसियाको कन्डिसनमा रणनीतिक हिसाबमा नरेश पहिलो रोजाईमा पर्न सक्छन् ।

नेपालविरुद्ध कप्तानी

नेपाली टोली गतवर्ष आइसिसी विश्वकप लिग-२ मा स्कटल्यान्ड भ्रमण गर्नुअघि क्यानडामा गएर तयारी गरेको थियो । क्यानडाको टोलीसँगै त्यहाँको स्थानीय टोलीविरुद्ध पनि अभ्यास खेल खेलेको थियो ।

जुलाईमा नरेशले मेपल लीफ क्रिकेट क्लब-११ बाट नेपालविरुद्ध कप्तानी गरेका थिए । पहिलो खेलमा नरेशले ४८ बलमा २ चौका र १ छक्कासहित २८ रन बनाएका थिए । दोस्रो खेलमा ३४ बलमा २ चौका र २ छक्कासहित ४१ रन बनाएका थिए । दुबै खेलमा नरेशले कप्तानी गरेको टोली नेपालसँग हार्न पुगेको थियो ।

नेपाल र अन्य देशबाट खेल्ने पहिलो खेलाडी

यदि नरेशले क्यानडा टोलीबाट खेले भने उनी नेपाली क्रिकेट टोली र अन्य देशबाट खेल्ने पहिलो खेलाडी बन्नेछन् । हालसम्म कुनैपनि नेपाली टोलीबाट खेलेका खेलाडीले अन्य देशको सिनियर टोलीबाट खेलेका छैनन् । आइसिसीको नियम अनुसार एक टोलीबाट खेल्न छाडेको तीन वर्षपछि मात्रै अर्को देशबाट खेल्न पाइन्छ । नरेशले त्यो तीन वर्ष गतवर्ष नै प्राप्त गरि सकेका छन् ।

अब कहिले खेल्छ क्यानडा ?

२०२४ को टि२० विश्वकपको लागि अमेरिका क्षेत्रीय विश्वकप छनोट आगमी सेप्टेम्बर ३० देखी ७ सम्म बर्मुडामा हुँदैछ । उक्त प्रतियोगितामा क्यानडा, बर्मुडा, केयम्यान आइसल्यान्ड र पानामा छन् । जसको विजेता टोलीले २०२४ मा अमेरिका र वेस्टइन्डिमा हुने विश्वकपमा स्थान बनाउनेछ । क्यानडाले हाल खेल्ने तालिका यहि छ ।

लिग-२ को तालिका भने विश्वकप पछि मात्रै सार्वजनिक हुने सम्भावना छ । यस विषयमा हाम्रो खेलकुदले नरेशसँग कुरा गर्न खोजेपनि अहिले आफू केहि नबोल्ने र क्यानडाको टोलीमा परेपछि मात्रै बोल्ने बताए ।