एजेन्सी – तीव्र गतिका बलर तथा कप्तान जस्प्रित बुमराहको उत्कृष्ट पूनरागमन प्रदर्शनमा भारतले पहिलो टि२० आई खेलमा घरेलु टोली आयरल्यान्डलाई डकवर्थ लेविस पद्धतिको आधारमा दुई रनले हराएको छ । योसँगै तीन टि२० आई खेलको सिरिजमा भारतले १-० को अग्रता लिएको छ ।

जितको लागि १ सय ४० रनको विजयी लक्ष्य पछ्याएको भारतले ६.५ ओभरमा २ विकेट गुमाउँदै ४७ रन बनाएको अवस्थामा खेल वर्षाको कारण रोकिएको थियो । त्यसपछि वर्षाको कारण खेल हुन नसकेपछि भारत डकवर्थ लेविस पद्धतिको आधारमा विजयी भयो । ओपनर ऋतुराज गायकवाड १६ बलमा १ चौका र १ छक्कासहित १९ रन र सञ्जु स्यामसन १ रनमा नट आउट रहे ।

तीव्र गतिका बलर क्रेग योंगले सातौं ओभरको दोस्रो बलमा ओपनर यशस्वी जैसवाललाई २४ रनमा क्याच गराए । सर्ट बलमा जैसवाल कप्तान पल स्टर्लिङबाट क्याच हुनुअघि २३ बलमा ३ चौका र १ छक्का प्रहार गरे । लगत्तै अर्को बलमा तिलक बर्मा वाइड बलमा एज लागेर पेभेलिएन फर्किए । आयरल्यान्डका क्रेग योंगले ५ बलमा २ रन खर्चेर २ विकेट लिए ।

त्यसअघि टस हारेर पहिला ब्याटिङको निम्तो पाएको आयरल्यान्डले निर्धारित २० ओभरमा ७ विकेट गुमाउँदै १ सय ३९ रन बनाएको थियो । आयरल्यान्डका ब्यारी म्याकार्थीले ३३ बलमा ४ चौका र ४ छक्कासहित ५१ रनमा नट आउट रहे ।

कर्टिस क्याम्फर ३३ बलमा ३ चौका र १ छक्कासहित ३९ रनमा आउट भए । एक समय १०.३ ओभरमा ५९-६ को दयनीय अवस्थामा पुगेको आयरल्यान्डलाई सातौं विकेटका लागि क्याम्फर र म्याकार्थीले ४७ रनको साझेदारी गरेका थिए ।

एक वर्ष भपछि भारतीय टोलीमा फर्किएका बुमराहले पहिलो ओभरमै दुई विकेट लिएका थिए । बुमराहले एन्ड्रयु बालबर्नीलाई ४ रनमा बोल्ड आउट गरे ।

बुमराहको बलमा लोर्कान टकर सन्जु स्यामसनबाट क्याच आउट भएका थिए । स्पिनर रवि विश्रोईलो पल स्टर्लिङलाई ११ रनमा बोल्ड गरे । प्रसिद्ध कृष्णाले ह्यारी टेक्टरलाई ६ रनमा क्याच गराएपछि आयरल्यान्ड २७-४ को दयनीय अवस्थामा पुगेको थियो । जर्ज डोकरेल १ र मार्क आदिर १६ रनमा आउट हुँदा आयरल्यान्ड ५९-६ को अवस्थामा पुगेको थियो ।

भारतका जस्प्रित बुमराहले ४ ओभरमा २४ रन खर्चेर २ विकेट लिए । बुमराहनै खेलको प्लेयर अफ द म्याच चुनिए । रवि विश्रोई र प्रसिद्ध कृष्णाले समान दुई विकेट लिए ।

अर्शदीप सिंहले ४ ओभरमा ३५ रन खर्चेर १ विकेट लिए । अन्तिम ओभरमा अर्शदीपले २२ रन खर्चिएका थिए । दोस्रो खेल आइतबार र तेस्रो खेल बुधबार हुनेछ ।